Сулейман-Стальский районда, 2019-2021-йисара рекьер ремонтуниз талукь программадин бинедаллаз, республикадин «Курхуьр-КIварчагъ-Сиртыч» улакьрин рехъ ремонт авунин кIвалахар давам жезва. Идакай «Лезги газетдиз» Сулейман-Стальский райондин администрациядин пресс-къуллугъди хабар гузва.   

Алай вахтунда и участокдин НуьцIуьгъ хуьрелай КIварчагъ-ЦицIигъ къекъуьндал кьван мензилдиз (9-12 километр) чиргъ вегьизва, рекьин лишанар эцигзава ва бязи чкайрик кутунвай асбестдин турбаяр дегишзава.

Ремонтдин вири кIвалахар, тайин графикдив кьурвал, Сулейман-Стальский райондин администрациядин гуьзчивилик кваз, «Дербентдин ДЭП №13» тешкилатди кьилиз акъудзава.

Малумарзавайвал, ремонтдин кIвалахар йисан эхирдалди тамамдаказ куьтягьда.

«Лезги газет»