Са тIимил вахт идалай вилик Калуга шегьерда универсальный женгерай дуьньядин чемпионат кьиле фена. Ана 150-далай виниз спортсменри иштиракна.

Россиядин хкянавай командадик кваз ана 90 килограммдин заланвиляй майдандиз спортдин международный классдин мастер, Кьасумхуьрелай тир Аслан Къурбановни экъечIна. Сифте гуьруьшра 4 касдин, финалдани Азербайжандай тир спортсмендин винел инанмишвилелди гъалибвал къачуналди, А. Къурбанова 1-чка кьуна. Гила ада кьуд лагьай сеферда универсальный женгерай дуьньядин чемпионвилин тIвар къачуна.

Къейд авун лазим я хьи, Аслана спортдин рекье машгьур спорсменар ва тренерар тир вичин бубадин — дзюдодай, самбодай спортдин мастер Юрий Къурбанован, имийрин – дуьньядин чемпионар тир Рамазан ва Тельман Къурбановрин кар уьзягъдаказ давамарзава.

Универсальный женгерай кьуд сеферда дуьньядин чемпион хьиз, Аслан Къурбанов самбодай дуьньядин Кубокдин сагьиб, дзюдодай Россиядин чемпионатдин призерни я.

Чна Аслан Къурбановаз нубатдин сеферда  дуьньядин чемпионвилин тIвар къачун мубаракзава ва адахъ спортда мадни чIехи агалкьунар хьана кIанзава.

Хазран Кьасумов