И йикъара ДГПУ-дин спортдин комплексда армрестлингдай Дагъустандин кIвенкIвечивал патал акъажунар кьиле фена. Идакай «Лезги газетдиз» Сулейман-Стальский райондин администрациядин пресс-къуллугъди хабар гузва.
Чешмеди малумарзавайвал, гъилерин къуватар ахтармишунин акъажунра республикадин шегьеррайни районрай 250 кьван спортсменди иштиракна.
Республикада армрестлинг машгьур авунин ва армрестлингдай Россиядин СКФО-дин чемпионатда ва кIвенкIвечивал патал акъажунра иштиракдай лап хъсан спортсменар хкягъунин мураддалди тешкилай акъажунра Сулейман-Стальский райондин спортсменрин дестедини агалкьунралди иштиракна.
Акъажунрин нетижада Сулейман-Стальский районда Малик Тагьирбегован регьбервилик кваз спортдал машгъул жегьилри гъалибвилерни хъсан чкаяр къазанмишна. Гъалиб хьайибурун жергеда Теймур Гьажибегов, Тельман Азизов ва Алибег Межидов ава. Мегьамедрасул Сафаркъулиева, Алим Абдурагьимова, Эмир Ибрагьимова 2-чкаяр ва Шамсудин Алиева 3-чка кьуна.
Агалкьунар хьайи спортсменриз РД-дин физический культурадин ва спортдин министерстводин патай грамотаяр, дипломар, медалар гана.
Къейд ийин, гъалиб хьайибуру ва хъсан чкаяр кьурбуру къведай йисан (2019) 13-17-февралдиз Москвада армрестлингдай кьиле фидай Россиядин кIвенкIвечивилин акъажунра иштиракда.
Жегьил несилдиз хъсан тербия гунин ва РД-да армрестлинг еримлу авунин карда агалкьунралди иштиракзавай тренер Малик Тагьирбегов «Лап хъсан судья» медалдалди ва грамотадалди къейдна.
«Лезги газет»
