И йикъара Махачкъалада, А.Е.Карпован тIварунихъ галай шахматрин школада, «Дагъустан Республикада аялар шахматрал къугъун ва аялрин спорт вилик тухун» темадай элкъвей стол кьиле фена. Ана РФ-дин Госдумадин образованидин ва илимдин рекьяй Комитетдин член Гьажимет Сафаралиева, Махачкъаладин администрациядин спортдин, туризмдин ва жегьилрин крарин рекьяй комитетдин председатель Марат Ибрагьимова, РД-дин шахматрин федерациядин президент Жакай Жакаева, Дагъустандин образованидин ва илимдин министерстводин аялрин алава образование вилик тухунин отделдин начальник Лариса Калмыковади, РД-дин физический культурадин ва спортдин министерстводин пешекарвилин образованидин ва резерв гьазурунин отделдин начальник Шамил Нажмудинова, РДЮСШ-дин директор Александр Маркарова ва масабуру иштиракна.
Элкъвей стол ачухдайла, Гьажимет Сафаралиева шахматар школада мажбуридаказ чирун лазим тир тарсарин (предметрин) сиягьдик акатна кьвед лагьай йис тирди къейдна. Адан гафаралди, спортдин важиблу и жуьреди алай аямда аялдин кьатIунар вилик тухуниз куьмекзава. И жигьетдай ада школайриз куьмек гунин лазимвал авайди къейдна. Кьилди къачуртIа, образованидин идарайриз аялрин спортдин и жуьредин сирер чирдай пешекар жагъурун лазим тирдакай лагьана.
Марат Ибрагьимова шегьердин комитетдик акатзавай 16 идарада шахматрал машгъул жезвай, 14 йисал къведалди яшара авай аялрин кьадар къвердавай артух жезвайди къейдна. Идалайни гъейри, ада А.Е.Карпован тIварунихъ галай школада вердишвилер къачузвай гадайрини рушари международный турнирра виниз тир нетижаяр къазанмишзавайди раижна.
Шегьерда шахматрин спорт вилик тухунин темадикай ихтилат давамарай Лариса Калмыковади хабар гайивал, республикадин образованидин министерстводи А.Е.Карпован тIварунихъ галай ДЮСШ школайра шахматрин жуьре вилик тухудай центр яз гьисабзава, ада образованидин идарайра шахматрин спорт вилик тухуниз куьмекзава.
Республикадин жаван шахматистрин агалкьунрикай ва школада кьиле тухузвай кIвалахдикай рахай Жакай Жакаеван гафарай малум хьайивал, эхиримжи кьве йисуз Дагъустандин хкянавай командади СКФО-дин кIвенкIвечивал патал акъажунра хъсан нетижаяр къалурзава. Школайра шахматрин тарс тун спортдин и жуьре вилик тухунин ва машгьурунин рекье важиблу кам я. Шахматриз итижзавай аялрин кьадар йисалай-суз артух жезва.
Шахматрин спорт вилик тухунин планрикай Шамил Нажмудинова ва масабуруни чпин фикирар лагьана. Элкъвей столдин иштиракчийрин меслятар фикирда кьуналди, эхирдай талукь къарар кьабулна.
Чи мухбир
