Дербентдин администрациядин кьилин везифадив эгечIай сифте йикъарилай башламишна, Хизри Абакарова гзаф месэлайрихъ галаз санал шегьерда физкультура ва спорт вилик тухунизни кьетIен фикир гузва. Малум тирвал, шегьердин цIийи мэр спортда ягъи кас туш: жегьил вахтара ам азаддаказ кьуршахар кьунал, дзюдодал ва маса жуьрейрал машгъул хьана, ада спортдин клубриз, федерацийриз регьбервал гана.
Мукьвара Хизри Абакаров шегьердин 3, 5 ва 10-нумрайрин аялринни жаванрин спортшколайриз фена. Анра спортдин рекьяй вердишвилер къачузвай гьалдихъ, тренеррин ва тербиячийрин кIвалахдихъ галаз таниш хьана, игьтияжар чирна.
Къадир Пирсаидован тIварунихъ галай 5-нумрадин ДЮСШ-да кьиле фейи гуьруьшда директор Н.Асланбегова, дзюдодай спортдин мастер М.Амирметова ва шегьердин собранидин депутат З.Жавадова Дербент шегьердин спортдин мектебра машгьурвилер къачузвай жаванри республикадин, Кеферпатан Кавказдин ва уьлкведин дережайра кьиле физвай саки вири акъажунра активвилелди иштиракзавайди ва хъсан нетижаярни къазанмишзавайди къейдна.
Гьа са вахтунда спортшколадин материально-технический база зайиф тирдини лагьана. ТIалабунар фикирда кьуналди, шегьердин кьили спортшколадиз лазим тадаракар маса къачун хиве кьуна.
Шегьердин 3 ва 10 – нумрайрин ДЮСШ-ра Хизри Абакаров дараматар авай гьалдиз килигна, спортдин жуьрейрай машгъул хьунин кIвалахдихъ галаз таниш хьана.
3-нумрадин ДЮСШ-дин директор, Россиядин Федерациядин лайихлу тренер Садых Абдуллаева шегьердин мэрдиз и спортшколада тIвар-ван авай спортсменри чIехи спортдиз чпин рехъ башламишайдакай суьгьбетна. Абурукай сада — дзюдодай Европадин ва дуьньядин чемпион Камал Ханмегьамедова алай вахтунда дзюдодай Россиядин дишегьлийрин командадин кьилин тренервиле кIвалахзавайди къейдна.
Гуьруьшрин эхирдай Х.Абакарова спортшколайрин жаванрихъ ва тербиячийрихъ галаз шикилар яна, абурухъ спортда генани чIехи агалкьунар хьана кIанзавайди алхишна.
Нариман Къарибов
