Лезги газетдиз
( Ода )
За кхьизва къе “Лезги газетдиз” и адетдинди тушир ода,
Кьудкъанни цIуд йисалай гзаф, — лезги халкьдин тереф хуьзва ада.
Четин заманаяр, вахтарни хьана,тадияр гайи адаз,
Килигиз тазвай мажбурдив, жуванбур амаз, патан чарадаз.
Дустар, стхаяр я лугьуз хъуьтуьлдиз, гьуьрметдивди гьакI винелай…
Вегьиз тазвай вичив, чи лезги халкьдин къайгъу, тереф гъилелай.
Четин тир везият, зид тир инсан,сада-садан иви хъвазвай,
Гагь кузвай къизмар ракъини, гагь цаварай ракьарин марф къвазвай.
ЯтIани лезги халкьдин тарих чир хъувуна, ахкъудна винел,
Вичивай жедайвал куьмекна, югъ — къандавай ахкьалтиз кIвачел.
Са береда зини хьанай адахъ галаз неразивал, векъи.
Куьз лагьайтIа, кьазвачир лезги терефдихъ галаз адан рекьи…
Хъел атана кхьенвай за адан тIварцIиз ажугъдин къайи, шиирар,
Вучиз лагьайтIа, какадарнавай гьакьарни, халкьарни, девирар…
Дуьз къанни са йис хьана хъилер, атIанвай араяр, къунвай чин…
Чи халкь кIеве авай, бейкеф тир, кас амачиз пад кьадай вичин…
Дерт гзаф тир лезги халкьдин, — атанвай кьисмет гьялна кIанзавай чIав.
Чибуру кIеверай акъудзавай гъейрибур, кьаз балкIандин жилав…
Зини юзана пехъи жинерар, акатна зак жегьнемдин цIай.
Вири хъилер зи, сел хьана, къизмиш хьана, икьван чIавалди ксай…
Еке тарни ярх жеда, къеняй тIуьрла гьашаратри, куквари…
Ахпа алтугдайди я вири душманар, чинар тар кукIвариз…
Амма са гъалатIни квачир жезвайди туш дуьньяда са касни,
ГьакIни, виридаз вири жедайди туш гьамиша багьа, хасни…
Лезги газетди са тегьер хуьзва лезги чIал, лезги терефни…
Белки бахтунай къайдада гьат хъийин чи пак лезги келефни…
Гьахьняй, кхьена кIанда, хвена кIанда, чна лезги газет кьуна вине,
Гьар са кас лезги, ви буржи язва, хуьн хайи чIал — Ватандин бине…
И ода бахшзава за дуьньядин чIалан эвел тир лезги чIалаз,
Къияматдал амукьрай такьат, гужлу хьурай Ватанда ви аваз!
2014-йис
Зи лезги чIал
( Ода )
Зи лезги чIал, чIехи къуват ганва хьи ваз, чкадлай,
Вун — хазина, амукьнавай заз девлет яз бубадлай.
Эхъвез кIанда заз – баладиз ви дерьядин деринра,
Дегь дегьнеяр атIана на, белед хьана виринра.
И зунни вун вилаятра, заманайра къекъвена,
Балаяр хьиз вафалу тир, мад Ватандал элхкъвена.
Кьилиз тухуз ви куьмекдал мурадар чи халкьарин,
Агъзур йисар – атIанай за тик мензилар дагъларин…
Къавкъаз дагълар далуяр я, Цаву ганвай багърияр,
Чаз гьабурун, гьабрузни чи хъсан чида дердияр.
Саф Къизилдин чида къадир, устIар ятIа, заргардиз,
Дагъви-устIар, Сад Аллагьди къилих ганва «пайгардин».
Лезги чIални гужлу такьат, къуват гудай инсандиз,
Хвена кIанда лезги вуна дин, диде хьиз, хъсандиз.
2015-йис
Шарвили
( Ода )
Шарвили, вун къенинкъалди зи одайрик ктканвач,
Куьз лагьайтIа, ваз лайих тир къизил гаф заз жагъанвач.
Вун кьегьал я, агъзурсарай къадам вегьиз экъечIай,
Лезги халкьдин чIехи даях, дердисер яз эгечIай.
Чи халкьари даиман вун кьабулнава бейнидив,
Вун яз хьана заманайра адаз пара кIаниди.
Вун акьазва четин юкъуз лезги халкьдин гьавуна,
Кьвед кьегьалар, гъил-гъилеваз экъечIзава гъамунай…
Эркекбуруз тешпигь я вун, кьегьалвилин къилихдин,
Ватан багьа, ягь-намус хуьр, хилаф квачир синихдин.
Имам Касди,1 жуьрэтдивди ви тIвар цавуз ахкъудна,
Вунни ви халкь, кьегьалди хьиз, кьвед багърияр ахгудна.
Къенин юкъуз заз Аллагьди шиир кхьин эмирна,
Вад гаф кхьин, а ви кьегьал, пагьливандин девирдай.
Вун кьегьал тир михьи рикIни гужлу руьгьни мез авай.
Халкьдин дердер вичинбур хьиз рикIин къенез кIватIзавай.
Чун лезгияр физвай рекье агъзур халкьар терг хьана,
Гьиллейрини тапаррини гьахъсузвили чеб кана.
Крарин чIехид – Сад Аллагь я, чун дуьньядиз акъудай!
Гьар са халкьдив вичин лайихдиз къвезвай чуп вугудай.
2017-йис
Имам Кас – инал: Имам Музамединович Яралиев
(“Бубайрин весияр” ктабдай. Орфография, пунктуациядин лишанар ктабда авайвал хвенва ).
«Лезги газетдин» 2018-йисан 49-нумрадай
