Саид дуьньядиз атанвай а береда
Девлетлуйри гьалзавай вахт тир девран.
Чандал гъанвай ханари Кьурагь дере,
Халкьди чIугваз гъам-хажалат, куз гьижран.
Зигьин авай, кьатIунарни тир дерин…
Буба кьиникь, кар язава са зулум.
Аял вахтар ашукьдин хьанай серин,
Медресадикай Саид хьана магьрум.
Лежбер кIанидаз Саид хьана лежбер,
Чубан кIанидаз ам хьана чубан.
Теснифай чIалар, ийиз жедай эзбер,
Кфил, саз гваз синерал, вични яз кIубан.
Гуьзел чIалар, гьаваярни теснифна,
Жемятар ашукьди авуна уях.
Эдебиятдин кимел ам илифна,
Кесибриз Саидакай хьана даях.
Ширин везин ярашугъ я чIалариз,
Межлис гур хьун гьунар я къе Саидан.
Себеб жезва гаф рикIерин тIалариз,
Фелекди чаз аманат яз гайидан.
Ашукь хьана Саид Дилберал гуьзел,
Такур югъ жегьилриз жезвай мичIи йиф.
Ашкъидин чIаларин сел алаз мецел:
— Кемендиз элкъуьра, яр ви яргъи киф.
Экуьнахъ экъечIдай ракъинихъ галаз,
Наз гваз къекъведайла, маралдиз ухшар,
ПIузарар — некьияр, мили хъвер алаз,
Килигдай пехил яз Кьуьчхуьррин рушар.
— Тек бубу я экъечIнавай вун никIе,
Кетин дагъдин зериф шагьвар илифна.
Жида хьана акIимир ман зи рикIе…
Кайи бейтер къелем — ярдиз теснифна.
— Саздин ванци хъуьруьрзава ви вилер,
Зи дердинин язва, суна, вун дарман.
Жагъана заз, Дилбер яр, къе ви гелер.
Лугьузва за кузвай рикIин эрзиман.
Алхас булах… Гуьзел я нисин бере,
Арш цавариз акъатна Саидан ван.
Шад манийрив ацIана Кьуьчхуьр дере,
На лугьуди, булахдал къе ала чан…
Эйзудин Сайдумов
