Уьлкведин дережада чи халкь чIехиди туштIани, чи ватанэгьлийри чпин бажарагълувал жуьреба-жуьре регионрани уьлквейра къалурзава. Гьелбетда, гъурбатдиз акъатунин кьилин себеб абуруз чкайрал гегьенш мумкинвилер тахьунихъ галаз алакъалу я. Исятда неинки Россиядин, гьакI маса уьлквейрин шегьеррани лезги алимар, тIвар-ван авай духтурар, алакьунар авай карчияр ава.
Алай вахтунда Волгоград шегьерда яшамиш жезвай Фирудин Жарулаевич Абдуллаевни алакьунар авай пешекар, медицинадин илимрин кандидат я. Ам КцIар шегьерда дидедиз хьана. Азербайжандин госмединститут акьалтIарна, 1988-йисуз медицинадин илимрин кандидатвилин диссертация хвена. Жегьил алимди 9 йисуз Волгограддин медицинадин университетда тарсар гана. Фирудин Абдуллаева а шегьерда авай изобретателрин институтни куьтягьна, гьа рекьяй тапшуругъар гьялунин теория мукьуфдивди чирна.
Дерин чирвилер авай ватанэгьлиди медицинадин тежрибадиз хсуси программаяр гъана. Ам медицинадайни статистикадай кхьенвай илимдин 20-далайни гзаф кIвалахрин автор я. Волгоград шегьерда ада «Медсервис СБТ» тIвар алай стоматологиядин клиникайрин сеть арадал гъана. 1993-йисалай Фирудин Жарулаевич агалкьунралди кIвалахзавай клиникайрин генеральный директор я. Ада Волгоградда сарарин азаррин вилик пад кьунин рекьяй сифте яз Америкадин система кардик кутуна.
Ф.Абдуллаева Британиядин бизнесдин школа (ОУШБ), Москвада хизандин психологиядин институтда “Эриксоновский гипноз” курсарни куьтягьна.
Ам 1997-йисалай международный Ротари клубдин член я. 1999-2000-йисара адакай Волгоградда авай Ротари клубдин президент хьана.
Фирудин Абдуллаев сиягьатдал гзаф рикI алай инсан я. Ам Германияда, Финляндияда, Эмиратра, Кипрда, США-да, Таиландда, Непалда, Андоррада, Туьркияда, Гималай, Эльбрус дагълара ва хейлин маса чкайра са шумудра хьана. Алимди къейдзавайвал, ам гьар йисуз сиягьатдиз физва. Дагъларал, альпинизмдал гзаф рикI алайвиляй ада “Альпинист. Дневник врача” тIвар алай ктабни акъудна.
Чи ватанэгьлидин гьакъисагъ зегьмет ЧIехи Петрдин медалдалди къейднава.
Фирудин ва Зарифа Абдуллаеврин хизанда кьве хва ава — Эльяр ва Камил. Къуй абурухъни уьмуьрда еке агалкьунар къазанмишдай мумкинвилер хьурай!
Куругъли Ферзалиев
