Гьуьрметлу ватанэгьлияр!

Алай йисан 18-декабрдиз, сятдин 15:00-даз, Махачкъалада авай Расул Гьамзатован тIварунихъ галай милли ктабханада лезгийрин жегьил писатель, шаир ва журналист Ферида Ибрагьимовадихъ галаз яратмишунрин гуьруьш кьиле фида.

Мярекат итижлудаказ, са шумуд хилез талукьарна, кьиле фида. Ф.Ибрагьимова илимдал, яратмишунрал вам аса менфятлу крарал машгъул инсан я. Гуьруьшдал атайбуруз ада чапдай акъатнавай вичин ктабрикай, илимдин кIвалахдикай ихтилатда, цIийи шиирар кIелда. Ибурулайни гъейри, мярекатдал атай гьар са касдив пишкеш агакьда. Мярекат кьиле фидай залдин ракIар ашкъи авай вирибур патал пулсуздаказ ахъа я.

Къейд ийин, Ф.Ибрагьимова урус чIалал кхьенвай «Кто я для тебя?», «Мир без войны», «У тебя все получится» ва маса ктабрин автор, Москва шегьердин писателринни таржумачийрин Союздин член, «Чан алай классика» Вирироссиядин кIелдайбурун жюридин гьамишан член я. Медиадин рекьяйни ам са шумуд проектдин автор я. Са гафуналди, жегьил писателдихъ са шумуд рекьяй алакьунар ава. Абурукай квез мярекатдал гегьеншдиз чир жеда.

Квехъ галаз гуьруьшмиш хьун патал Москвадай хквезвай ватанэгьлидин мярекатда иштиракун рикIелай ракъурмир, гьуьрметлу ватанэгьлияр!

«Лезги газет»