Арсен Муслимов 1978-йисуз Дагъустандин Огни шегьерда кьепIирвияр тир Эмирбеганни Зарадин хизанда дидедиз хьана.
2000-йисуз Даггосуниверситетдин физикадин факультетда хъсандиз кIелиз ва вуздин жегьилрин арада активвал къалуриз хьайи Арсена физикадинни математикадин илимрин доктор, про-фессор Рабадан Рабаданован регьбервилик кваз кхьей дипломдин кIвалахди алимрин фикир желбна. Къейд ийин, яргъал йисара кIвалахна, 1972-йисуз Москвада СССР-дин АН-дин кристаллографиядин Институтда илимрин кандидатвилин диссертация хвена, Дагъустандиз хтай Рабадан Рабаданова ДГУ-дин патав ростовый лаборатория арадал гъанай. Муаллимди гележег авай жегьилни вичин рекьяй виликди фидайвал авуна. Адан теклифдалди 2001-йисуз Арсен Муслимов Москвада РАН-дин А.В. Шубникован тIварунихъ галай Кристаллографиядин институтда инженервиле кIвалахал тайинарна.
Уьлкведин меркезда жегьилдин вилик цIийи мумкинвилер ачух хьана. Ина ада вичин муаллимар хьайи машгьур алимрин — физикадинни математикадин илимрин докторар В.М. Каневскийдин, В.Е. Асадчикован, физикадинни математикадин илимрин кандидатар В.П. Власован, А.В. Буташинан гъилик кваз институтдин “Поисковые ростовые технологии» отделда агалкьунар къазанмишзавай.
А.В. Буташина лангасит хьтин надир кристаллдиз талукь сифте ахтармишунар авуна. В.Е. Асадчиков лагьайтIа, материалрин винел патар рентгендин куьмекдалди ахтармишунин къайдайрин хиле вири дуьньяда машгьур алим я. В.П. Власован илимдин ахтармишунар пешекаррин арада виридалайни гзаф ишлемишзавайбур я лагьайтIа, гъалатI жедач. В.Каневскийди ихьтин машгьур алимри ва чи ватандаш Арсен Муслимова зегьмет чIугвазвай отделдиз илимдин жигьетдай регьбервал гузва ва 20 йисалай гзаф вахтунда РАН-дин А.В. Шубникован тIварунихъ галай Кристаллографиядин институтдин регьбер я.
Чпин пешедин халис устадар тир абурун къаюмвилик кваз 2009-йисуз Арсен Муслимова вичин вилик илимдин цIийи тереф ахтармишун — кьетIен физический ерияр авай, пайгардик квай нанофаза арадал гъунин макьсаддалди кристаллрин винел пад идара ийидай жуьреда цIийикIа туькIуьр хъувунин кутугай къайдаяр жагъурунин месэла эцигна. ИкI, А.Муслимова 2012-йисуз а месэла кьилиз акъудна ва талукь темадай кандидатвилин диссертация хвена. Гуьгъуьнлай Арсен Муслимов вичин кандидатвилин диссертациядин бинедаллаз а месэла мад цIийи патахъай ахтармишиз эгечIна.
И йикъара чав Арсен Муслимов физикадинни математикадин илимрин доктор хьанва лагьай муштулух агакьна. Им дамахиз, алимдиз, адан муаллимдиз, мукьвабуруз тебрикиз жедай кар я.
Арсен Муслимова датIана вирироссиядин ва международный дережайрин конференцийра, конкурсра иштиракзава. Вичи иштиракай гьар са мярекатда ада кIвалахдин юлдашрин фикир желбдай докладар ийизва, конкурсра сифтегьан чкаяр кьазва ва премийриз лайихлу жезва. Ам “РОСНАНО-2011”, А.Б.Шубникован тIварунихъ галай (2012-йис) премийрин сагьиб я.
Алай вахтунда алимди РАН-дин А.В. Шубникован тIварунихъ галай Кристаллографиядин институтдин “Кристаллография и фотоника” ФНИЦ подразделенидин лабораториядин заведующийдин везифаяр тамамарзава. И лабораториядихъ къе тонкоплёночный нанокъурулушар ахтармишунин жигьетдай зурба база ава. Ина гележег патал важиблу са шумуд хиляй кIвалах тухузва. Месела, нитридный технологийрикай рахайтIа, им светодиодный электроникадин ва виниз тир вольтрин транзисторрин бине я. Алай вахтунда физикадин кар алай ихьтин хилериз талукь кIвалахар ина мадни тухузва. И карда чи ватандаш Арсен Муслимован пайни гъвечIиди туш. Лабораториядин илимрин кIвалахрай Арсен Муслимован регьбервилик кваз са шумуд грантни къачунва.
Институтдин вичи регьбервал гузвай лабораторияда илимдин ахтармишунрал машгъул хьунихъ галаз сад хьиз, чи ватандаш анин гьар йикъан умуьрдивайни къерех жезвач, и кардани вичин активвал къалурзава. Адахъ тешкилатчивилин гьахьтин алакьунарни ава. Месела, 2017-йисуз РАН-дин “Кристаллография ва фотоника” ФНИЦ-дин директор хкягъунин сечкияр кьиле фидайла, Арсен Муслимов сечкидин комиссиядин председатель тир. Ам илимдин гьар жуьре конкурсрин жюрийрин жергейрани датIана аквада.
Чаз жегьилри вичин уьмуьр бахшзавай хиле агалкьунар къалурзавай Арсен Муслимов хьтин ксарилай чешне къачуна кIанда. Мубаракрай Арсеназ илимрин докторвилин чIехи дережа!
Азиз Мирзебегов
