Дагъустандин властри республикадин жуьреба-жуьре муниципалитетра зирзибил чара ийидай ирид ва гьялдай са завод эцигун планламишнава, хабар гузва РД-дин Кьилин ва Гьукуматдин Администрациядин пресс-къуллугъди.
“Республикада зирзибилдин хъуртар махсусдаказ гьазур тавунвай чилерал ала, бязи вахтара хуьрерин патарив гва. КIватI хьанвай зирзибил тергунин кIвалах лагьайтIа адаз цIай ягъуналди акьалтIарзавай. Гьелбетда, гьавадиз, инсанрин сагъламвилиз зарар жезвай. И месэла гьялун патал Дагъустанда гьар жуьредин зирзибил сад-садавай чара ийидай ирид ва ам тамамдаказ гьялдай са завод эцигда”, — лагьана Дагъустандин экологиядин ва тIебиатдин ресурсрин министр Набиюла Къарачаева Дагъустандин Хатасузвилин советдин заседанидал.
Адан гафаралди, заводар эцигдай майданар тайинарнава. “ЧIехи умудар чна федеральный “Михьи уьлкве” программада иштиракуник кутазва”, — къейдна Н.Къарачаева.
Министрди хабар гайивал, республика ТБО-дихъ галаз кIвалахунин цIийи къайдадал элячIзава. “И месэла гьялун патал чахъ Дагъустандин Гьукуматдин Председателди тестикьарнавай “рекьерин карта”, протокол ва кьабулна кIанзавай серенжемрин график ава. ИкI, Къизляр ва Избербаш шегьеррай гьардай са чка ихьтин амукьаяр кучукдай объектрин госреестрдик кутунва. Идалайни гъейри, мад кьуд полигон эцигун патал пул фикирда кьунва”, — алава хъувуна Н.Къарачаева.
“Чна, зирзибилдилай башламишна, медицинадив агакьдалди вири хилера къайда твада. Инсанрив пулсуздаказ гузвай дарманар авайдалай гзаф агакьда, абуру михьи гьавадалди нефес чIугвада ва икI мад. Ихьтин къайдасузвилер мад жедач. Амай вири терефризни талукь я и гафар. Инсанри чпин уьмуьр, дугъриданни, хъсан патахъ дегиш жезвайди гьисс авурла, чахъ агалкьунар хьанвайдакай лугьуз жеда”, — лагьана Владимир Васильева.
Идалай вилик, 9-ноябрдиз, Дагъустандин Гьукуматдин цIийи составдихъ галаз танишардай мярекатдал Н.Къарачаева хабар гайивал, 2019-йис патал республикадин пуд шегьерда — Махачкъалада, Дербентда ва Хасавюртда зирзибил чара ийидай пуд завод эцигун патал 174 миллион манат фикирда кьунва. 2020-йисуз и рекьиз 560 миллион манат чара ийидайвал я.
Чи мухбир
