Къенин зи куьруь суьгьбет Волгограддин областдин губернатордин заместитель, ана промышленностдин ва алишверишдин комитетдин председатель Роман Беговакай я.
Роман 1963-йисан 1-июндиз Азербайжанда дидедиз хьана. Алакьунар авай лезгиди 1989-йисуз “политическая экономия” пешедай Саратовдин областдин гьукуматдин университет куьтягьна. Илимдин рекьевай пешекарди генезисдиз ва менеджментдиз, алай аямдин Россиядин экономикадин гьалариз, карчивал вилик тухунин важиблу месэлайриз, кредитринни банкарин хилериз итиж ийизва.
Экономикадин илимрин кандидат тир Роман Сергеевича вичин пешедин рекьяй 30-далайни гзаф илимдин кlвалахар кхьенва. Университет куьтягьайдалай кьулухъ ада пуд йисуз Волгограддин хуьруьн майишатдин институтда политэкономиядин кафедрада ассистент яз кlвалахна. Алакьунар авай чи ватанэгьли, лезгидиз хас тирвал, къуллугъдин гурарай виниз хкаж хьана. 1991-йисуз ам Волгограддин областдин государстводин налогрин инспекциядин чlехи госинспектордин къуллугъдал хьана. Идалайни гъейри, 1991-1992-йисара Роман Сергеевича “Раритет” кооперативный банкдин правленидин председателдин заместитель яз кlвалахна. Финансрин хиляй вини дережадин тежрибани чирвилер авай алим 1992-1993-йисара “Менеджмент-банкдин” правленидин, гуьгъуьнлай ругуд йисуз “КОР” банкдин правленидин председатель тир.
Волгоград шегьерда, областда гьуьрмет, нуфуз авай ватанэгьли къуллугъдин гурарай анжах виликди хкаж жезва. Пешедин рекьяй ада ВГУ-дин экономикадин кафедрада доцент яз кlвалахна. 2004-2007-йисара Волгоград шегьердин кьилин заместитель хьана, коммерциядин банкарин ассоциациядин кьилени акъвазна.
2010-йисуз Роман Бегова Волгограддин областдин губернатордин заместителвилин — областдин промышленностдин ва алишверишдин комитетдин председателвилин везифаяр кьилиз акъудна. 2014-йисан 13-апрелдиз ам областдин промышленностдинни алишверишдин министрвиле тайинарна.
Машгьур ватанэгьли къуй мадни кьакьан дережайрив агакьрай!
Куругъли Ферзалиев
