Луткунрин хуьруьн мискIин 2008-йисуз чкадин жемятдин куьмекдалди, абурун мергьяматлувилин садакьайрихъ эцигна (шикилда). Алай вахтунда анин имам Эмир Султанбегов я. Чна адавай вичин кIвалахдикай суьгьбет авун тIалабна.
— Квез аквазвайвал, мискIинда капI-тIеат авун патал вири къулайвилер тешкилнава. — Икьван чIавалди мискIинда чими хьун патал электроэнергиядикай менфят къачузвай. Гила хуьруьн сагьибри иниз газ гъун хиве кьунва. Динэгьлияр патал гъилер чуьхуьн къачудай кьилдин чка ава. Чими ва къайи цин кранар, гьамам, санузел кардик ква. КапI авурдалай гуьгъуьниз динэгьлийривай Кьуръандикай, гьадисрин ктабрикай менфят къачуз жезва. МискIиндай гьар юкъуз вад сеферда азан гузва, лагьана имамди.
Луткуна капIзавайбурун кьадарни къвердавай гзаф жезва. Мисал яз, са 4-5 йис вилик иниз 60 кас динэгьлияр къвезвайтIа, алай вахтунда абурун кьадар 200-лай алатнава. Абурукай гзафбур жегьилар я.
Гьар жуьме юкъуз, купIунин вилик, мискIинда вяз-насигьат, капI авурдалай гуьгъуьниз хуьруьн инсанрихъ, иллаки жегьилрихъ галаз марифатдинни ахлакьдин темайрай таъсирлу суьгьбетар тешкилзава. Кесибриз, бедбахтвал кьилел атай ксариз куьмек авун гьар са мусурмандин пак тир буржи я. И месэлайризни гьар йикъан дикъет гузва.
2006-йисалай Луткунрин медреседа араб чIалай тарсарни гузва.
МискIинда дишегьлийриз капIдай кьилдин чка туькIуьрнава.
Лагьана кIанда, Луткунрин хуьруьн жемятди сурарни михьидаказ хуьзва. Иниз хипер, малар татун патал 85 метр яргъивал, 1 метрни 80 сантиметр кьакьанвал авай цал эцигнава, амай мензил сеткадалди кIевирнава. Хуьруьн мискIиндихъ 4,5 гектар чилни га-ла. Гатуз анай кьве сеферда векь яна, маса гузва, а пулдихъ чарасуз къайгъуяр туькIуьрзава. Бухгалтерни ава. Ада гузвай садакьадин пуларин гьахъ-гьисаб тухузва. Къведай йисуз мискIиндин гьаятда плита твадайвал я…
Рагьидин Эминов
