Кьасумхуьрел кардик квай самбодинни дзюдодин ДЮСШ-да вердишвилер къачузвай спортсменри республикада, уьлкведа тухузвай турнирра ва чемпионатра кIвенкIвечи чкаяр кьаз гзаф йисар я. Спортшколадин тербиячийрикай Россиядин, Европадин ва дуьньядин чемпионарни призерар хьанва.
ДЮСШ-дин директор, пешекаррин арада дзюдодай дуьньядин чемпион, Россиядин лайихлу тренер Тельман Къурбанова лагьайвал, мукьвал йикъара спортшколада вердишвилер къачузвай са шумуд касди республикадин дережадин кьве турнирда иштиракна ва мад сеферда чпин устадвал къалурна.
ИкI, 2002-2004-йисара дидедиз хьайи жаванрин арада самбодай Дагъустандин кIвенкIвечивал патал Мегьарамдхуьруьн районда кьиле фейи акъажунра чи райондай тир 10 спортсменди иштиракна. Абурукай Насир Халилова (46 кг), Алибутай Гьажибутаева (60 кг) ва Камил Рамазанова (72 кг) приздин 3-чкаяр кьуна. Абур РД-дин образованидин ва илимдин министерстводин дипломриз, медалриз лайихлу хьана.
Ноябрдин сифте кьилера Махачкъала шегьерда кардик квай Али Алиеван тIварунихъ галай спортдин комплексда чIехибурун арада самбодай кьиле фейи чемпионатда Сулейман-Стальский райондай тир Мариф Межидова (82 кг) 2-чка, Марат Къужаева (74 кг) 3-чка кьуна. Абуру ва и чемпионатда 95 килограммдин заланвиляй 5-6-чка кьур Вагиз Дадашева гила Нальчик шегьерда кьиле фидай Кеферпатан Кавказдин Федеральный округдин чемпионатда иштиракда.
Хазран Кьасумов
