Мукьвара Ессентукида футболдай СКФО-дин ачух турнир кьиле фена. Адет хьанвай спортдин и мярекат 2006-2007-йисара дидейриз хьайи аялрин арада “Къизилдин зул” лишандик кваз гьар йисуз тешкилзава. Кеферпатан Кавказдин регионрай тир 11 командадик Дербент шегьердин “Тефи” тIвар алай командани квай.
Тежрибалу муаллим-тренер Ибрагьимпаша Султанова вердишарзавай “Тефи” Алания Республикадин Ардон шегьердин командадихъ галаз 2:1 гьисабдалди къугъуникди финалдиз акъатна. Гьайиф хьи, 1-чка патал кьиле фейи четин матчдин нетижада “Тефи” Карачаево-Черкесия Республикадин Хабез шегьердин командадиз 2:0 гьисабдалди кумукьна.
И.Султанова къейдзавайвал, футболистрихъ финалдин матчдин вилик ял ядай вахт лап тIимил — са югъ авай.
ИкI, Дагъустан Республикадин патай и акъажунра векилвал авур къадим Дербент шегьердин “Тефи” командади 2, Махачкъала шегьердин А.Маркарован тIварунихъ галай ДЮСШ-дин футболистри 3-чкаяр кьуна.
Турнирдин виридалайни хъсан вратарь — Абдусалам Амирханов, защитник Надир Гьажиибрагьимов (“Тефидин” векилар) яз гьисабна. Тамашачийрин патай приз “Тефидин” полузащитник Асад Асадоваз, виридалайни хъсан голдай пишкеш дербентви Къурбан Рабадановаз хьана.
Салман Гьажиев
