РД-дин хуьруьн майишатдин ва недай суьрсетдин министерстводи «гзаф йисара гьакъисагъ зегьмет чlугунай, РД-дин хуьруьн майишат вилик тухуник пай кутунай Мегьарамдхуьруьн райондай тир фермер Жумарт Эмирбегов гьуьрметдин грамотадалди къейдна. И гьакъиндай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.
16-ноябрдиз Махачкъаладин «Дуствилин кlвале» кьиле фейи «Дагъустандин къизилдин зул – 2018» аграрный форумда Мегьарамдхуьруьн райондин делегациядини, кьиле райондин хуьруьн майишатдин отделдин директор Ф.Рагьимханов аваз, иштиракна.
Республикадин мярекатдал РД-дин Гьукуматдин председатель Артем Здунова тебрикдин гафар лагьана. Мярекатдин сергьятра аваз, АПК-дин хиле агалкьунралди кlвалахнавай фермеррив шад гьалара гьукуматдин шабагьар вахкунин серенжемни кьиле фена. Шад жедай кар ам я хьи, чпин гьакъисагъ зегьмет гьуьрметдин грамотадалди къейд авурбурун арада Мегьарамдхуьруьн райондин агьали Жумарт Эмирбеговни ава.
Хуьруьн майишатдиз талукь форум РД-дин муниципальный районрин гьевескар артистри концерт гуналди акьалтlна. Мегьарамдхуьруьн райондин патай РД-дин культурадин лайихлу работник, тlвар-ван авай ашукь Айдун Мегьамедова иштиракна.
«Лезги газет»
