Чун, виликан комсомолдин организацийрин членар, комсомолри кьиле тухвай баркаллу кIвалахрин шагьидар я.
Садазни сир туш, 90-йисаралди ВЛКСМ-ди вичин кIвалах лап вини дережада аваз, чешнелувилелди , гьар са зегьметкеш инсандик ашкъи, руьгь кутаз, тешкилнавай.
Зи рикIел школада кIелай вахтар хквезва. Сифтегьан классар акьалтIарайла, пионервилиз кьабулдай, гуьгъуьнлайни — комсомолдиз. Чаз чи везифаяр чидай, абур вахтунда ва истемишзавай саягъда кьиле тухудай. Комсомол организацияди гьар гатуз ученикрин производственный бригадаяр тешкилдай. Аниз гуьгьуьллувилелди фидайбур гзаф жедай ва, ашкъидалди кIвалахна, чпиз пек-партал, ктаб-дафтар къачудай пулни къазанмишдай. И кар совхоздиз еке куьмек тир, жегьил-жаванарни зегьметдал рикI алаз вердиш жезвай. Аялар сагълам, викIегьни тир, хцини, лигимни жезвай. КIвалахрикай кьил баштан ийизни чидачир. Тербиядин кардани жегьилар гуьгъуьна амукьзавачир. Яшлубурун кIвалериз физ, абуруз кIарасар хадай, яд гъидай, кIвалин михьивилердай. Мелер авуналди, сада-садаз куьмекар гудай.
Инал виликан комсомолрин тIварар кьун кутугнава, алай вахтунда чи арада амачтIани (чпиз Аллагьди рагьметар гурай): Разуев Азиз “Дагъустандин лайихлу багъманчи” лагьай гьуьрметдин тIварцIиз лайихлу хьанай.
10 аялдин диде Разуева Халумагъадиз Ленинан орден ганай, адан шикил Дагъустандин Гьуьрметдин доскадиз акъуднай.
ВЛКСМ-дин ЦК-дин гъиляй-гъилиз къведай Яру Пайдах къачур Мегьамедов Жамирзедиз Болгариядиз фидай путевка ганай. Совхоздин комсомолрин бригададин бригадир Исакьова Рабият СССР-дин Верховный Советдин депутатвиле хкянай.
Комсомолдин 100 йис тамам хьунихъ галаз алакъалу яз, чи Герейханован 2-нумрадин юкьван школада маналу са шумуд мярекат кьиле тухвана. Комсомолдин ветеранар тир Абдулвагьабова Мислиматахъ ва Селимханова Айишатахъ галаз гуьруьш тешкилна. “Диде-бубайрин пионервилин ва комсомолдин рекьер” фотоконкурс, “Зоя Космодемьянскаядин кьегьалвал” классдин сят кьиле тухвана. “Комсомолдин баркаллу рехъ” тIвар алаз ктабрин выставка гьазурна. “Комсомолар зи тарихда” шикилрин конкурс тешкилна. Комсомолдин девир тIвар алаз телевиденидиз видеоролик гьазурна.
Р.Алиметова,
дидед чIаланни литературадин муаллим, РФ-дин умуми образованидин лайихлу работник
