Инанмишвилелди лугьуз жеда хьи, комсомолдин рехъ чи уьлкведин тарихда гзаф лишанлуди ва баркаллуди хьана. Жегьил йисара комсомолдин кIвалахдихъ галаз зунни алакъалу хьайиди я. 1978-йисуз Даггосуниверситетдин филологиядин факультет куьтягьна хтай зун ВЛКСМ-дин Ахцегь райкомдиз кIвалахал кьабулна. И йисуз райондин комсомол организациядин учетда 7 агъзурдалай артух жегьилар авай.
А йисара райондин экономикада дурумлу гьалар авай ва ам йигиндаказ вилик физвай. 1978-йисуз производстводин асул рекъемрай къазанмишнавай виниз тир агалкьунрай ва государстводин тапшуругъар артухни алаз тамамарунай Ахцегь район КПСС-дин ЦК-дин, СССР-дин Министррин Советдин, ВЦСПС-дин ва ВЛКСМ-дин ЦК-дин гъиляй гъилиз къведай Яру Пайдахдиз лайихлу хьанай. Гьелбетда, агалкьунрик райондин комсомолрин ва жегьилрин пайни квай. Хейлин жегьилар комсомолдин ва Гьукуматдин патай шабагьриз лайихлу хьанай. Чеперин хуьруьн К.Марксан тIварунихъ галай колхоздин кIвенкIвечи доярка Мая Мамедалиева лагьайтIа, РСФСР-дин Верховный Советдин депутатвиле хкянай.
Чна а йисара жегьилар ватанпересвилин руьгьдаллаз, бубайрин баркаллу адетриз вафалу яз тербияламишуниз кьетIен фикир гузвай. Райондин культурадин кIвале мукьвал-мукьвал ватанпересвилин тематикадиз талукь серенжемар, Ватандин ЧIехи дяведин иштиракчийрихъ галаз жегьилрин гуьруьшар тешкилзавай. Районда ва республикада футболдай, волейболдай, азаддиз кьуршахар кьунай ва спортдин маса жуьрейрай кьиле тухузвай акъажунра иштиракуналди, чи спортсменри чпин бажарагълувал, викIегьвал къалурна.
Комсомолда кIвалахиз хьайи 1978-1980-йисара зун тефей саки са хуьрни амач. Асул гьисабдай зун хуьрериз чкайрал алай сифтегьан комсомол организацийрин кIвалах ахтармишиз, абуруз кимивилер арадай акъуддай меслятар гуз, ВЛКСМ-дин райкомдин бюродал гъидай месэлаяр гьазуриз физвай. Идахъ галаз санал комсомолдин жергейриз кьабулнавайбурув шад гьалара членвилин билетарни вахкудай. И йисара зани, тешкиллувилин отделдин инструктор яз, цIудралди жегьилар Вирисоюздин комсомолрин зарбачи эцигунрал рекье туна. Абуру гьанани гьакъисагъ зегьметдин чешнеяр къалурзавай.
Гьайиф хьи, уьлкведихъ галаз санал КПСС-дин, ВЛКСМ-дин къурулушарни чкIана. Алай вахтунда уьлкведа КПРФ-дин ва жегьилрин цIийи къурулушар кардик кватIани, абурухъ виликан жанлувал амач. ВЛКСМ-дин 100 йис тамам хьун — им адан жергейра хьайи гьар садан, ветеранрин, къенин жегьилринни чIехи сувар я.
Нариман МАМЕДОВ, 1978-1980-йисара ВЛКСМ-дин Ахцегь райкомдин
тешкиллувилин отделдин инструктор
