Ингье вирида гуьзлемишзавай кар акьалтIна, Дагъустан Республикадин цIийи гьукумат тешкилна. Кьве министр квачиз, амайбур вири чпин къуллугърал аламукьна. РД-дин юстициядин министр Къазимегьамед Сефикъурбанов Хив райондин Вини Яракрин хуьряй я. РД-дин зегьметдин ва яшайишдин жигьетдай вилик финин министрвиле тайинарнавай Мугутдинова Изумруд Махачкъалада дидедиз хьана.
Дагъустан Республикадин Кьил Владимир Васильева цIийи гьукуматдин вилик чIехи ва жавабдар везифаяр эцигнава. Лап кар алайбурук акатзава: Дагъустандин Огни ва Каспийск шегьерра яшайишдинни экономикадин рекьяй вилик фидай территория тешкилун, амайбурулай йигин еришралди республикадин пуд сменада кIвалахзавай школайрин кьадар тIимиларун, умуми программайрин куьмекдалди эцигзавай школайрин дараматар вахтунда ишлемишиз вахкун, республикадин агьалияр хъвадай виниз тир еридин целди таъминарун, меркездин ва Каспийск шегьердин чиркин ятар михьи авунихъ галаз алакъалу имаратдин кьвед лагьай пай куьтягьун, федеральный шегьредин хейлин рехъ Дербент шегьердин къецяй тухун, ацахьзавай ва я чкIидай гьалда авай кIвалерай агьалияр цIийи кIвалериз ахкъудун, электроэнергиядин тарифар тайинарунин (РФ-дин Генеральный прокуратурадин пешекарри авур ахтармишунри тестикьарайвал, электроэнергия ишлемишунай къачузвай пуларин кьадар хкажнава ва гьа идалди муьштерийрин ихтиярар чIурзава) карда къайда тун, агропромышленный комплекс вири рекьерай вилик тухун…
Эхиримжи вахтара къайдаяр хуьдай органри республикада кьиле тухвай ахтармишунри гзаф татугайвилер, бюджетдин пулар вара-зара авунин дуьшуьшар дуьздал акъудна. РД-дин эцигунрин ва яшайишдин кIвалерин коммунальный майишатдин министр Малик Баглиева РД-дин Кьил В.Васильеваз малумат гайивал, агьалияр хъвадай михьи целди таъминарунихъ галаз алакъалу 11 объектдин проектдинни сметадин документар ахтармишайла, 0,6 млрд. манат артух къалурнавай.
Махачкъаладин коллектордикай рахайтIа, адан проектдинни сметадин документар туькIуьрайбурун иштягьар акьван екебур тир хьи, ам эцигун патал 13,5 млрд. манат пландик кутунвай. Гила, вири рекьерай ахтармишунар хъувурла, тайин хьанва хьи, ксари коллектордин къимет саки 8 млрд манатдин гзафарнавай. 1989-йисуз гъиле кьур коллектор гила ишлемишиз вахкун патал гьукуматди герек вири серенжемар кьабулдайвал я. ТахьайтIа, меркездин, Каспийскдин агьалияр ва республикадиз Каспий гьуьл акун патал къвезвай гзаф кьадар мугьманар чка-чкадай чиркин ятар авахьзавай гьуьлуьн дармандин ятара эхъвез тежез авай.
И йикъара Дербент шегьердихъ галаз Кеферпатан Кавказдин федеральный округда РФ-дин Президентдин гьамишалугъ векил Александр Матовниковни таниш хьана. Ада В.Васильевахъ, РД-дин Кьилин ва Гьукуматдин Администрациядин руководитель В.Ивановахъ, Дербент шегьердин администрациядин кьил Х.Абакаровахъ галаз шегьер яшайишдинни экономикадин рекьяй вилик тухуниз талукь совещание кьиле тухвана ва Дербент гевгьер хьтин шегьердиз элкъуьрунин карда куьмекар гудайди хиве кьуна.
Кьилинди, В.Васильева РД-дин Гьукуматдин членар ва маса ведомствойрин кьиле авайбур чпин везифаяр намуслувилелди тамамарунин гьакъиндай тагькимарнава ва гуьзчивални ийидайдакай лагьанва.
Хийир Эмиров
