Сулейман-Стальский райондин аялрин центральный ктабханада Дидедин йикъан сувариз талукьарна «Диде рагъ хьиз анжах жеда сад» лишандик кваз музыкадинни шииратдин мярекат кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва.

Мярекатда аялри ва кlелчийри иштиракна. Ам тешкилайди ва кьиле тухвайди ктабханадин заведующий Ч.Абдулгьафисова я. Кlватl хьанвайбуруз ада  хуш келимаяр ва вири дидейрин адресдиз тебрикдин гафар лагьана. Ада чи уьлкведа ва къецепатан уьлквейрани Дидейрин югъ гьикl къейдзаватlа, гьадакай суьгьбетна. И сувар арадал атунин тарихдикайни малуматар гана. Ктабханадин къуллугъчийри дидедикай мисалар кlелна. Мярекатдин иштиракчийри дидедиз бахшнавай манияр, шиирар гзаф лагьана, кlелна.

Мярекатдиз талукь яз «Дидеяр хуьх!» лишандик кваз ктабрин выставкани тешкилнавай.

«Лезги газет»