Месэлаяр веревирдна
США-дин президент Д.Трампа Россиядин, Франциядин, Германиядин ва маса уьлквейрин кьилерихъ галаз са шумуд месэла, гьа жергедай яз юкьван ва гъвечlи мензилдиз фидай ракетайриз талукь икьрарни веревирдна. “Новости” РИА-ди хабар гузвайвал, идакай Лацу кIвалин пресс-секретарь Сара Сандерса малумарна.
Абуру дуьньядин сад лагьай дяве куьтягь хьайидалай инихъ 100 йис тамам хьунин мярекатар кьиле фейи Парижда, нисинин тIуьн недай кьве сятдин вахтунда ихтилатарна.
Сандерса алава хъувурвал, уьлквейрин регьберри Сирияда, Саудовский Аравияда авай гьаларин, алишверишдин, санкцийрин, Афгъанистандин, Китайдин ва Кеферпатан Кореядин гьакъиндайни рахунар авуна. Пресс-секретардин гафарай, регьберрин арада лап хъсан ва менфятлу веревирдер кьиле фена.
Парижда Трампахъ галаз рахайдакай журналистриз Путинани малумарна. Адани къейдна хьи, суьгьбетар хъсан гьалара кьиле фена.
Сергьят эцигун теклифна
Краснодарский крайдин законодательный собраниди Госдумадиз йифен вахтунда духанра ички маса гунин кар са кьадарда къадагъа авунин законопроект теклифнава. Идакай “Новости” РИА-ди хабар гузва.
Сергьят эцигунин месэла инсанар яшамиш жезвай кlвалера ва я кlвалерихъ гилигнавай чкайра авай духанриз талукь жеда. Ихьтин чкайра йифен сятдин 11-далай йикъан 11-далди кура-кура ички маса гунал къадагъа эцигун теклифнава. Закондин проект агьалийрин сагъламвал хуьнин дережа хкажунин макьсаддалди туькlуьрнава. Заксобранидин векилри къейд авурвал, яшамиш жезвай кlвалера алвердай чкаяр ва кафеяр кардик квайвиляй региондин гьукумдиз анра яшамиш жезвай агьалийри общественный къайдаяр чlурзавай дуьшуьшриз талукь яз гзаф кьадарда арзаяр ийизва.
Туьркияди тереф хуьдач
Туьркиядин президент Реджеп Тайип Эрдогана малумарайвал, США-ди Ирандиз талукь яз кардик кутунвай санкцийрин тереф Туьркияди хуьдач. Идакай Arab News чешмеди малумарнава.
Эрдогана США-ди кьиле тухузвай гьерекатар дуьзбур туширди къейдна. Адан гафарай, ихьтин гьерекатар дуьньяда гъулгъула тунихъ элкъуьрнавайбур я. И фикир ада Тегерандиз талукь яз США-ди кардик кутур кьвед лагьай санкцияр къуватда гьатайдалай кьулухъ малумарна.
Кьилди къачуртlа, сергьят эцигунин месэлаяр Ирандин 700 тешкилатдиз ва физический ксариз талукь жеда. Идалайни гъейри, санкцийри Ирандин экономикадин бязи хилеризни пис таъсирда.
Д.Трампан гафарай, Иранди Вашингтондихъ галаз ядерный программадиз талукь цlийи икьрар кутlунун герек я. Акси дуьшуьшда уьлкведа “экономикадин мусибат” арадал къведа.
Ирандин президент Хасан Роуханиди малумарна хьи, уьлкведи Америкадин санкцийрихъ галаз акси женг тухуда ва нафт маса гунин кар давамарда.
Ирандиз акси яз США-ди кардик кутур сифте санкцияр алай йисан 7-августдиз къуватда гьатнай. Абур Трампа вичин уьлкве ядерный икьрардай экъечlунин къарар кьабулайдалай кьулухъ гьазурна. Америкадин регьберди икьрардин шартlар кьилиз акъуднач лугьуз, иранвийрик тахсир кутуна.
Ихтилат физвай икьрар Тегерандинни ругуд уьлкведин (Россия, США, Великобритания, Китай, Франция ва Германия) арада 2015-йисуз кутlуннай.
Цlийи пеше
Мукьвал вахтара Россияда цlийи пеше пайда жеда — цифровой куратор. “Лента.ру” сайтди малумарзавайвал, идалай вилик ихьтин пеше авачир.
Чешмеди кхьизвайвал, цифровой кураторди яшлу инсанриз цифровой ресурсар ишлемишдай къайдаяр чирда. Кьилди къачуртlа, пенсионерриз онлайн къайдада пулдихъ галаз алакъалу гьахъ-гьисабар авунин карда куьмек гуда, электронный къайдада документар ракъуриз ва кьабулиз чирда. Кураторри чирвилер гудай махсус майданар декабрдин вацра арадал гъидай фикир ава.
SuperJob порталдин делилралди, IТ-пешекар ва интернет-маркетолог пешеяр виридалайни итиж ийизвай теклифар я. Россиявийрикай 36 процентди чпин пешедин дережа хкажун хъсан яз гьисабзава. Месела, компьютердин программайрай кьил акъудун, кlвалахдин нетижалу къайдаяр чирун чарасуз яз гьисабзава.
Уьмуьр гьикl яргъи ийида?
Британиядин алимри уьмуьр 5-10 йисан яргъи авунин виридалайни таъсирлу къайдаяр тайинарнава. Идан гьакъиндай Daily Mail чешмеди кхьизва.
Августдин вацра Гарвардский университетда кьиле тухвай ахтармишунри инсандин уьмуьр цlуд йисан яргъи ийиз жедай кар алай къайдаяр винел акъудна. Абурук тlуьнин дуьз къайда, сагълам ахвар, гьатта са кьадарда ички ишлемишунни акатзава.
Ахтармишунрин сергьятра аваз, 50 йисалай чlехи яшда авай 660 касди иштиракай илимдин тежриба тухвана. Алимрин фикирдалди, аялар авачирбурулай тафаватлу яз, аялар авайбур 2-3 йисан артух яшамиш жезва.
Уьмуьр яргъи хьун патал Гарвардский университетдин алимри гзаф къекъуьн, куьлуь-шуьлуьйрин патахъай азарханайриз фин тавун теклифна.
И мукьвара США-дин Пенсильваниядин университетдин ахтармишунрал машгъул алимри малумарайвал, соцсетра гзаф вахт кечирмишуни ялгъузвилин, теквилин гьиссер артухарда ва кьатlунунрин, акьулдин къуват агъузарда.
Гьазурайди — Куругъли Ферзалиев
