24-июлдиз Къарабудахкент районда “Ракъинин кьер” ял ядай базада динриз талукьарнавай жегьилрин форум ачух хьана.
Къейд ийин хьи, динрин уртах и форум — им уьлкведин жуьреба-жуьре регионрай ислам, хашпара ва иудаизм вяз ийизвай жегьил ксар кIватI хьанвай надир майдан я.
Аниз диндин ва общественный деятелриз, гьакIни государстводинни конфессийрин алакъайрай экспертриз теклифнавай.
Форумдин кIвалах ирид юкъуз давам жеда. И вахтунда адан иштиракчийри лекцийрихъ яб акалда, спортдин къугъунра иштиракда, архитектурадин памятникриз, фильмайриз килигда, сад-садахъ галаз гуьруьшмиш жеда ва Каспий гьуьлуьн кьере ял яда.
Форум тешкилайбур РД-дин Гьукумат, Республикадин муфтият, РД-дин диндин тешкилатрихъ галаз гафунин азадвилин ва сада-садахъ галаз кIвалахунин рекьяй комитет, Махачкъаладин Урусрин Хашпарайрин Килиса, Иудейрин общинайрин Совет я.
Мярекат РД-дин Гьукуматдин Председателдин заместитель Рамазан Жафарован рахунрилай башламиш хьана. КIватI хьанвайбур тебрик авуналди, вице-премьерди форумдин важиблувал къейдна. Ада Дагъустандин Кьил Рамазан Абдулатипован тебрикдин чар кIелна.
“Жуьреба-жуьре конфессийрин, миллетрин ва этнический группайрин векилар Дагъустанда асирралди ислягьвилелди ва разивилелди яшамиш хьана. Абурулай чпин чирвилер, руьгьдин истемишунар несилрилай несилрал агакьариз, Россиядин общество вилик финик лайихлу пай кутаз алакьна.
Къенин юкъуз Россия патал адетдинбур тир вири динрин векилри руьгьдин рекьяй цIийи хъжезвай девир кечирмишзава. Чи уьлкведиз къецепатан уьлквейрай къвезвайбурукай хейлинбуру къейдзава хьи, Россияда динэгьлияр неинки мискIинриз, ибадатханайриз ва синагогайриз физва, гьакIни абуру уьлкведин общственно-политический ва культурный уьмуьрда аквадай хьтин роль къугъвазва.
Исятда динэгьли жегьилар чеб обществода тербиялубур, савадлубур, культурадин виниз тир дережа авайбур, умудар ва руьгьдин ивирар кьилиз акъудзавайбур яз къалуриз чалишмиш жезва. За умудзава хьи, форумда куьне цIийи алакьунар ва вердишвилер къачуда, цIийи дустар, сад-садаз мукьва жеда, сад-садан гъавурда акьада. Гьа им чаз кIанзавай кьилин крарикай сад я”.
Р.Жафарован рахунрилай гуьгъуьниз жегьилрин форум ачухна, Россиядин Федерациядин ва Дагъустан Республикадин гимнияр яна.
Мярекатдал РД-дин Муфтийдин сад лагьай заместитель Идрис Асадулаев, Махачкъаладин РПЦД-дин епархиядин секретарь Иоанн, РД-дин иудейрин Советдин общинайрин председатель Валерий Дибияев рахана.
Мярекатда Минпечатдин ва Миннацдин руководителар тир Р.Акавова ва Т.Гамалея, Дагкомрелигиядин председатель М.Абдурагьманова ва маса ксари иштиракна.
