Алатай гьафтеда Махачкъалада, ДГУ-дин ректоратдин конференц-залда, машгьур журналист, общественный деятель, ДГУ-дин электронный СМИ-рин кафедрадин заведующий Ильман Алипулатован “Власть. СМИ. Общество: уровень доверия” тIвар алай ктаб веревирд авуниз талукьарнавай мярекат кьиле фена.

Автордин цIийи ктабдикай чпин фикирар инсандин ихтияррай Москвадин бюродин директор Александр Брода, ДГУ-дин ректор Муртазали Рабаданова, Махачкъала шегьер­дин депутатрин Собранидин председатель Абулмуслим Муртазалиева, РД-дин Общественный палатадин председателдин заместитель Алюсет Азизханова, “Республиканский центр образования” ГБУ-дин директор Анжела Байрамбеговади ва масабуру ла­­гьана. Абуру ктабда къарагъарнавай месэ­лайрин важиблувал, автордин хатIунин кье­тIен­вал, ам республикада авай гьаларив эгечI­за­вай тегьер, адахъ, алимдихъ, яратмишдай инсандихъ хьиз, авай алакьунар къейдна.

Мярекатдал Ильман Алипулатова къейд авурвал, вичин нубатдин ктабда ам Дагъустандин ва вири уьлкведин яшайишдинни ­сиясатдин уьмуьрдин хейлин месэлайрикай раханва, алай вахтунда СМИ-ри жемиятда къугъвазвай роль къалурнава, эхиримжи йисара СМИ-риз ва гьукумдиз ихтибар авуниз талукьарнавай хсуси фикирар раиж­нава.

Александр Бродан фикирдалди, Ильман Алипулатоваз республикада авай месэлаяр дериндай чизва. И кар адан цIийи ктабда гьатнавай макъалайрайни аквазва. Авторди Дагъустанда акьалтзавай несилрихъ галаз кьиле тухузвай кIвалахдиз, гражданский лидеррин цIийи несил арадал гъуниз, гьукумдинни жемиятдин арада алакъайриз ва са жерге маса темайриз кьетIен фикир ганва.

И.Алипулатован цIийи ктаб, 300 экзем­плярдин тираж аваз, Махачкъалада чапдай акъатнава.

Агьмед Магьмудов