16-ноябрдиз Докъузпара райондин Къалажухрин хуьре жемятдин сход кьиле фена. Ана хуьруьн жемятди, общественный хатасузвилин рекьяй Докъузпара райондин кьилин заместитель Къ.Мегьединова, Къалажух хуьруьн администрациядин кьил З.Мирзоева, Россиядин МВД-дин «Ахтынский» МО-дин работникар тир Р.Байрамалиева, Р.Кичебегова, И.Исмаилова ва РФ-дин ФСБ-дин сергьятрин къуллугъдин векил Э.Агьмедова иштиракна.

Сходдал алай кьилин месэла терроризмдизни экстремизмдиз аксивалунихъ галаз алакъалуди тир. Идалайни гъейри, агьалийрин иштираквал авай мярекатдал хуьруьн яшайишдихъ галаз алакъалу месэлаярни веревирдна.

Вичин рахунра Къ.Мегьединова къейд авурвал, терроризмдизни экстремизмдиз вирида санал аксивалун герек я. Адан гафарай, чи райондин цIудалайни гзаф агьалияр международный розыскда ава, абурукай гзафбур къалажухвияр я. ЧIуру, шаклу рекьера гьат тавун патал вирибур уях хьун чарасуз я. Эхирдай Къ.Мегьединова хуьруьн агьалийриз агъсакъалрин совет тешкилун теклифна. Гележегда абурун иштираквал аваз и ва маса месэлаяр веревирд ийиз, гьялиз жеда.

Э.Агьмедова сергьятдин зонайриз финин жигьетдай законда хьанвай дегишвилерикай, цIийивилерикай ихтилатна. Кьилин месэла веревирд авурдалай кьулухъ, агьалийри яшайишдин месэлаярни къарагъарна. Кьилди къачуртIа, П.Ягъуфова, А.Мимерзаева, Д.Яхьяева, М.Къарибова, Ш.Микаилова, Э.Бегбубаева, Д.Эмиралиева ва масабуру тIал алай месэлайрин гьакъиндай чпин фикирар лагьана.

Агьалийри хуьруьн къенепатан рекьер ремонт авунин чарасузвиликай лагьана, хуьре спортдал машгъул жедай гьич са мумкинвални авачирвиляй, мектебдин вилик квай багъдикай жегьилар патал футбол къугъвадай майдан туькIуьрунин месэлани къарагъарна. Мумкинвиликай менфят къачуна, агьалийри общественный хатасузвилин рекьяй райондин кьилин заместитель Къ.Мегьединовавай и месэлаяр гьялунин карда куьмек гун тIалабна.

«Лезги газет»