Алай йисан эхирдалди Дагъустан Республикадиз школаяр патал 140 автобус гуда. Им пландик кутунвайдалай кьве сеферда гзаф я. Идан гьакъиндай “Лезги газетдиз” РД-дин образованидин ва илимдин министерстводин пресс-къуллугъди хабар гана.
“Федеральный куьмек себеб яз, 2018-йисуз Дагъустандин школайрин автопаркда 140 автобус алава хъжеда. Им кьве варз идалай вилик пландик кутунвай рекъемдилай кьве сеферда гзаф я”, — къейдна суьгьбетчиди. Адан гафарай, алай йисан сентябрдин вацра республикадиз 70 автобус гудайдакай хабар ганай.
Улакьар гудай умуми образованидин идарайрин сиягь туькIуьрнава. “Кьилин фикир аялар чпи кIелзавай умуми образованидин идарадивай яргъа яшамиш хьуниз гуда”, — алава хъувуна пресс-къуллугъди.
Министерстводин делилралди, 140 автобус агакьайдалай кьулухъ республикадин школайрин автопаркдиз 106 улакьдин игьтияж амукьда.
2017-йисан декабрдин вацра, федеральный программаяр уьмуьрдиз куьчуьрмишунин сергьятра аваз, Дагъустандин образованидин идарайриз 30 автобус ганай. Идалай вилик, 2016-йисан августдиз, республикадиз школаяр патал 58 улакь чара авунай.
«Лезги газет»
