РД-дин Кьил Владимир Васильева и мукьвара Дагъустандин государстводин кьуьлерин академический лайихлу “Лезгинка” ансамблдин коллективдиз Россиядин оборонадин министерстводин патай “Сирияда женгинин гьерекатдин иштиракчи” медалар гана.
КIватI хьанвайбур тебрик авуналди, Дагъустандин регьберди, кьилди къачуртIа, лагьана: «Алай йисуз чи кьуьлерин лайихлу ансамблдин 60 йис тамам жезва. “Лезгинка” ансамбль жегьил, бажарагълу, уьтквем я. Вичиз гьахълудаказ Дагъустандин ярж лугьузвай коллективдин тарихда жанлу чинар гзаф ава. Чи уьлкведа кьиле физвай сиясатдин, экономикадин чIехи форумрин, спортдин международный турниррин культурный программа адан иштираквал авачиз бажармишзавач”.
Владимир Васильева къейд авурвал, “Лезгинкади” вичин алакьунар Австралиядилай ва ЦIийи Зенландиядилай гатIунна, Канададилай ва Япониядилай хкечIна, дуьньядин вири пипIера къалурзава.
“2017-йисан декабрдиз ансамблдин 45 касдикай ибарат коллективди Россиядин Федерациядин Военно-космический къуватрин къурулушдик квай Хмеймим авиабазада концертар гана.
Сириядиз фини “Лезгинка” ансамбль гьамиша халкьдихъ галаз санал тирди, гьатта женгинин гьерекатар кьиле физвай шартIарани ада Россиядин ва Дагъустандин гзаф миллетрин искусстводин патай векилвалзавайди рикIел хкана.
Сирияда концертар гьатта военный тревогадин ван акъатайлани акъвазарзавачир. Гьа икI, “Лезгинка” ансамблди неинки вич Сирияда кьиле физвай агьвалатрив гьикI эгечIзаватIа къалурна, гьакI, шартIар гьихьтин четинбур хьайитIани, инсанди гуьзелвилихъ ялзавайди, искусстводиз авай кIанивал кичIевилелай гужлу тирди, музыкадинни кьуьлерин чIалан гъавурда вирибур акьазвайди субутна”, — малумарна В.Васильева.
«Лезги газет»
