8-10-ноябрдиз Астраханда жегьилрин арада боксдай вирироссиядин турнир кьиле фена. Санлай къачурла, акъажунра уьлкведин жуьреба-жуьре пипlерай 190 спортсменди иштиракна.
«Лезги газетдиз» Сулейман-Стальский райондин администрациядин пресс-къуллугъди хабар гузвайвал, турнирда Дагъустандин патай 7 командади, гьа жергедай яз Кlварчагъай тир боксеррини иштиракна.
Кlварчагъ хуьре тренер Альберт Межидован гъилик вердишвилер къачузвай Абумуслим Гереева, Мирзамегьамед Абдулвагьабова ва Азим Меликова 2-чкаяр кьуна ва абур медалралди ва грамотайралди къейдна.
Сулейман-Стальский райондин жегьил боксеррин командади пулдин жигьетдай куьмек гунай «Завод минеральных вод «Рычал-Су» ОАО-дин регьбердиз чухсагъул лугьузва.
«Лезги газет»
