Мегьарамдхуьруьн райондай тир Амина Къайтмазовадикай Вирироссиядин кьезил атлетикадин федерациядин «1000 бажарагъ» проектдин лауреат хьана. И гьакъиндай «Лезги газетдиз» райадминистрациядин пресс-къуллугъди хабар гузва.

Цlинин йисуз кардик кутунвай ВФЛА-дин проектдин кьилин макьсад аялрин кьезил атлетика вилик тухун я. Ана Россиядин 71 региондай 15 йисан яшда авай 1000 аялди иштиракна. Проектда иштиракайбур регионра хъсан нетижаяр къалурайбур я. Абурун жергеда Мегьарамдхуьруьн райондин Буткъазмайрин ДЮСШ-да тренер Садир Къайтмазован гуьзчивилик спортдал машгъул жезвай Амина Къайтмазовани авай. Адаз кьезил атлетикадал машгъул хьун патал герек тир алай аямдин спортдин комплект пишкешна. Тренер Садир Къайтмазов лауреат гьазурунай ВФЛА-дин гьуьрметдин грамотадалди къейдна. Къуй абур спортда кьакьан дережайрив агакьрай!

«Лезги газет»