Гад тамамвилелди вичин ихтиярда гьатнава. Им хуьрерин зегьметчияр, хуьруьн майишатдин карханаяр, лежбервилинни фермервилин майишатар, ЛПХ-яр патал чуьлдин кIвалахрин виридалайни къизгъин вахтарикай сад я. Багъларани уьзуьмлухра, саларани производстводин маса хилера агротехникадин серенжемар тухунихъ, общественный мал-къарадиз алафар гьазурунихъ галаз санал, зегьметчийрин вилик техилар вахтунда ва пучвилер авачиз кIватI хъувунин везифани акъвазнава.
— Алай йисуз районда 1911 гектардай зулун магьсулар, 305 гектардай гатфарин къуьл ва 222 гектардай нехв кIватI хъийида, — лугьузва “Сулейман-Стальский район” муниципальный райондин хуьруьн майишатдин ва суьрсетдин управленидин начальник Мегьамедзагьид Бабаева. — Гад агудунив чун вири патарихъай гьазурвилер акуналди эгечIнава, кIвалахарни план-графикда къалурнавайвал кьиле физва. Шаз районда 5330 тонн техил кIватI хъувунай, цIи техилдин кьадар 5500 тонндилай артух хьун гуьзлемишзава.
Районда гад агудунив сифтебурукай яз “Дагъви” ООО эгечIна. Хуьруьн майишатдин ва суьрсетдин управленидин кьилин пешекар Шихзагьир Гьажимурадовни галаз чун инвесторди Кьулан СтIалдал тешкилнавай, райондин экономика мягькемаруник еке пай кутазвай кIвенкIвечи и карханадиз фена. Къизилдин ранг акьалтнавай никIер, ана агакьнавай техилдин хъсан бегьер, гад агудун патал гьакъисагъвилелди зегьмет чIугвазвай механизаторарни лежберар акурла гуьгьуьл шад жезва. Пакаман кьиляй акъатнавай кьезил шагьвардал лепе гузвай къуьлуьн кьилер акурла акI жезва хьи, гуя абуру чеб битмишарай лежберриз юкь агъузна икрамзава.
— Чи карханада 212 гектарда къуьл, 172 гектарда мух, 117 гектарда нехв ва 23 гектарда гатфарин къуьл цанва, — лугьузва майишатдин директор Раким Гьайвазова. — Чахъ гад агуддай са комбайн, самар туькера кьадай пресс-подборщик, цанар цадай трактор ава. Гьелелиг гьар са гектардай 23 центнер къуьл кIватI хъувунва. Яд тагузвай участокрай икьван бегьер къачун пис нетижа я лугьуз жедач.
Чун комбайнер Мегьамедзагьир Шабановахъ галазни таниш хьана. Адахъ и рекьяй 22 йисан кIвалахдин тежриба ава. Мадни, ада саки 30 йисуз механизатор-комбайнер яз кIвалахай вичин дах Шабанан кар давамарзава.
— Комбайнердин пеше четинди, гьа са вахтунда гзаф гьуьрметлуди я, — лугьузва М.Шабанова. — ГьикI лагьайтIа, комбайнерди халкьдин суфра берекатлу авун патал зегьмет чIугвазва, гьавиляй зун и пешедал кьаруни я.
Майишатдин никIера самар туькера кьунин кIвалахарни хъсан тешкиллувал аваз кьиле физвай. Виликамаз кьунвай гьисабралди, ина 5-6 агъзур тонн самар хьун гуьзлемишзава. Самарихъ карханда игьтияжни ава. ИкI, Раким Гьайвазова чаз лагьайвал, кархана гзаф хилеринди я. Магьсулрилай гъейри, адахъ 2700 лапаг, 78 къара-мал, 130 балкIан, чIижерин 130 куьнуь ава. Малум хьайивал, карханада 500 тонн сенажни кутада.
Гад агудунин кIвалахар давамарунихъ галаз санал, ООО-да къведай йисан бегьердин бине кутуникайни фикирзава. И кар патал карханада 25 гектарда чIурухъан чкайра цанар цанва, и кар давамарда.
Районда магьсулдарвал вилик тухуник пай кутазвай, гьар йисуз майданар артухарзавай карханаяр мадни ава. ИкI, хуьруьн майишатдин ва суьрсетдин управленидин кьилин пешекар Шихзагьир Гьажимурадова чаз лагьайвал, Курхуьруьн поселенидин территорияда КФХ-ри ва арендаторри алай йисан бегьер патал 335 гектарда, Агъа СтIалрин поселенидин территорияда 300 гектарда, Кьулан СтIалрин поселенида 530 гектарда техилар цанва.
Кьилдин карханайрикай лагьайтIа, “Паласа” ООО-да 150 гектарда къуьл, 76 гектарда нехв, “Зардиян” ООО-да 100 гектарда къуьл, 25 гектарда нехв, “Сайтар” ООО-да 115 гектарда къуьлни мух, “ЦIийи рехъ” СПК-да 42 гектарда къуьл цанва.
Районда никIерай гад агудунал 10 комбайнни желбнава, самар туькера кьунал пресс-подборщикар галай 12 трактор машгъул я.
Райондин хуьруьн майишатдин карханайра, КФХ-ра ва ЛПХ-ра гад агудунин кIвалахар давам жезва.
Квез къуватар хьурай, магьсулдарар!
Хазран Кьасумов
