Халкьдин садвилин юкъуз Сулейман-Стальский райондин Цlийи Макьарин хуьрени алай аямдин мини-футболдин майдан шад гьалара ачухунин мярекат кьиле фена. И гьакъиндай райадминистрациядин пресс-къуллугъди хабар гузва.
Государстводин программа уьмуьрдиз куьчуьрмишунин сергьятра аваз туькlуьрнавай спортдин майдандин яргъивилел 45 ва гьяркьуьвилел 25 метр ала. Ам туькlуьрун патал республикадин бюджетдай 2 миллион манат чара авуна. Кlвалахар Махачкъаладин «Кавсантехмонтаж» ООО-ди кьилиз акъудна.
Шад мярекатда райондин кьил Н.Абдулмуталибова, райондин депутатрин Собранидин председатель Штибег Мегьамедханова, райадминистрациядин кьилин заместителри, жавабдар къуллугъчийри, хуьрерин кьилери, спортсменри ва хейлин масабуру иштиракна. Н.Абдулмуталибова кlватl хьанвайбуруз кьетlен вакъиа тебрикна. Гуьгъуьнлай мугьманри майдан ачухунин лишанлу лент атlана.
Эхирдай аялрин кьве футболдин командадин арада цlийи майдандал акъажунар кьиле фена.
«Лезги газет»
