“Лезги газетдин” 42-нумрадин кIуьд лагьай чинай заз Мердали Жалилова композитор Халил Халиловакай кхьенвай рикIел хкунар ва а рагьметлудан шикил акуна. А бажарагълу инсандин шикил акурла, заз цифедикай хкатай рагъ акур кьван шад хьана. Адакай кхьенвай рикIел хкунри завни са кьадардин фикирар ийиз туна. М.Жалиловаз чухсагъул, ада Халилан айвандик чна санал тIуьр са кьас фу рикIелай алуднач. Командировкайрай хкведайла, Мердали Жалиловни зун, Нариман Ибрагьимовни Тажидин Мегьамедов Халил Халиловал кьил чIугваз фидай. Ам, чун акурла, вичи лугьудайвал, са чипIинин кьакьан жедай. Дугъриданни, М.Жалилова кхьизвайвал, “адан руьгь, рикI, вири беден музыкадин нотайрикай хьанвайди хьиз тир. Заз акуна, кхьизва авторди, ада анжах са тупIаралди ваъ, кьуьнтералдини, метIералдини, кIвачералдини музыка язавай, вичи туькIуьрнавай маниярни лугьузвай. Гьихьтин ширин сесиналди!..”
Зи рикIел са ихьтин кар хквезва. Нубатдин сеферда чун кьил чIугваз фейила, Халил кIвале авачир. Ам регъвяй гъуьр хкидай улакьдихъ къекъвезвай кьван. Зун фенай адан гъуьр хкиз. ТIебиатди вичиз илгьамдикай пай ганвай и касдин гьал-агьвал, яшайиш музыкадин устаддиндаз талукь жуьрединди тушир. ГьакI ятIани, ада чи халкьдиз гьихьтин гуьзел музыка туна. Эгер адаз ва ахьтин маса ксаризни яратмишдай къулай шартIар хьанайтIа, мумкинвилер ганайтIа, чи меденият мадни вини дережадиз акъатдачирни?!
Шаирар, писателар, композиторар лагьайла, гзафбуруз акI ава хьи, гуя абур чпихъ девлетар бул авай, цаварилай паяр ракъурзавай инсанар я. Гьакъикъатда акI туш эхир. Илгьамдикай пай ганвай касди, гишила амукьиз хьайитIани, тIалабдайди туш. Абур руьгь михьи, рикI хайи халкьдин бахтлувилихъ, гележегдихъ гьамиша кузвай ксар я. Зун, а вахтунда хьиз, гилани тажуб жезва, бес чкадин гьукумдарриз чпи регьбервал гузвай сергьятра вуж аватIа, ам квел машгъул ятIа, адан гьал-агьвал гьихьтинди ятIа чирун, адаз жедай са куьмек авун кутугнавай кар туш жал?!
Эгер гьакимар халкьдихъ галаз алакъада хьайитIа, са шакни алачиз, са бязи татугайвилер арадай акъудиз алакьдай.
Къуй Халил Халилован руьгь каинатда Аллагьдин регьимдикай хкат тавурай!
Шагьабудин Шабатов
