Эхиримжи йисара Сулейман-Стальский районда кардик квай рекьерин фондунин пулунин такьатрин гьисабдай хуьрерин куьчеяр, общественный дараматрин вилик квай майданар аваданламишунин еке кIвалах тухузва. ИкI, мисал яз, эхиримжи 2-3 йисан къене Кьасумхуьрел (Алидхуьр, ЦIийи поселокни кваз), Эминхуьре, Агъа СтIалдал, Вини СтIалдал, Агъа СтIалрин — Къазмайрал, Чуьхверхуьрел, ДаркIуш-Къазмайрал ва маса хуьрера кьилин куьчейра къир цана, тротуарар тухвана, куьчейра ва рекьерин къерехра йифен вахтунда экв гудай фонарар эцигна ва аваданламишунин маса кIвалахар кьилиз акъудна.
И йикъара Герейханован хуьре Мигьрали Бачханован тIварунихъ галай куьчеда къир цана. Райондин администрациядин капитальный эцигунрин управленидин начальник Низами Асланова лагьайвал, къир цанвай куьчеди санлай 2500 квадратный метрдин майдан кьунва. Рекьерин фондунин такьатрин гьисабдай къир цунин кIвалахар Мегьарамдхуьруьн районда кардик квай “Югдорстрой” ООО-дин махсус бригадади хъсан ери аваз кьилиз акъудна.
— Мигьрали Бачханован тIварунихъ галай куьче хуьре кьилинбурукай сад я, — лугьузва “Герейханован хуьруьн администрациядин кьил Руслан Алдырова. — Куьчеда 30-далай виниз яшайишдин кIвалер, культурадин дворец, библиотека, участковый больница, ДЮСШ, аялрин бахча ава. Ида куьчедин важиблувални артухарзава. Ана яшамиш жезвай агьалийри, винидихъ тIварар кьунвай идарайра кIвалахзавай инсанри, санлай хуьруьн вири агьалийри и къайгъударвиляй райондин кьил Нариман Абдулмуталибоваз, «Югдорстрой» ООО-дин коллективдиз чухсагъул лугьузва.
И куьчедин агьалияр-пенсионерар тир Сейфулагь Жинетова, Анарханум Фазиловади, Фероза Гьуьсейновади чавай хуьре яшайишдин месэлаяр гьялунин рекьяй тухузвай еке кIвалахдай райондин руководстводиз чухсагъул малумарзавай келимаяр кхьин тIалабна. Эхь, инсанриз ийизвай кIвалахар аквазва, абуру разивалзава. Им, гьелбетда,шадвал кутадай кар я.
Хазран Кьасумов
