АБДУЛ ФЕТЯГЬАН — 70 ЙИС
Дагъустандин писателрин Союзда 25-октябрдиз фольклорист, шаир, гьикаятчи, литературадин критик, аялрин рикI алай автор Абдул Фетягьан 70 йисан юбилейдиз талукь мярекат кьиле фена. “Ярар-дустар, мукьвабур кIватI хьана, вичин юбилей къейдун Абдул Фетягьан мурад тир”, — мярекатдин сифте кьиляй рикIел хкана адан уьмуьрдин юлдаш Гуьлназа.
Залда шаирдин мукьва-кьилияр, хтулар, ярар-дустар, общественный тешкилатрин векилар — адан яратмишунрихъ галаз таниш ксар кIватI хьанвай. Абур юбилярдикай анжах чими келимаяр рахазвай, дуст, хизандин кьил, меслятчи хьиз рикIел хкизвай. Махачкъаладин ва Каспийскдин са жерге школайра кIелзавай аялри, юбилярдин хтулрини адан шиирар хуралай кIелзавай.
Мярекат Дагъустандин писателрин Союздин лезги секциядин руководитель Владик Батманова ачухна ва кьилени тухвана. Микрофон гагь залда, гагь трибунадихъ гъилерай-гъилериз физ, Абдул Фетягьакай гзаф ксар рахана. Абурун жергеда Каспийскдай атанвай алим ва муаллим Исламудин Гьуьсейнов, Смугъулрин хуьряй меркездиз рехъ атIанвай шаир Мурсал Алпан, алим ва зари Фейзудин Нагъиев, Тахо-Годидин тIварунихъ галай педагогикадин илимринни ахтармишунрин институтдин къуллугъчи Жаклина Мейланова, Абдул Фетягьахъ галаз са кабинетда ацукьна кIвалахай шаир Зульфикъар Къафланов, Дагъустандин халкьдин шаир Арбен Къардаш, масабур авай.
Зульфикъар Къафланова вичин дуст “гафариз гатфар гъайи кас” хьиз рикIел хкана.
А.Къардаша вич юбилярдихъ галаз таниш хьайи вахтарикай суьгьбетна: — Абдул Фетягь за жуван чIехи стха яз гьисабзава. Чун 1980-йисуз таниш хьанай. Дагъустандин вири чIаларал аялар патал “Кард” журнал акъатиз башламишай вахт тир. Абдул Фетягь анин кьвед лагьай редакторвиле, Расим Гьажидихъ галаз санал кIвалахда лагьана атанвай. Лезги аялар патал “Кард” журнал литературадин жигьетдай хъсан дережада аваз, амай халкьаринбурулай тафаватлу яз майдандиз акъудуник Абдул Фетягьан еке пай квай. И кар за мадни, 4-курсуна авайла, “Кард” журналдин редакциядиз практикадиз атайла кьатIанай. И вахтунда чи дуствал, яшарин тафаватдизни килиг тавуна, мягькем хьанай. Гуьгъуьнлай чна “Дагучпедгизда” санал кIвалахнай…
А.Къардаш юбилярди чи фольклор, проза, шиират, издательствода кIвалахдайла, санлай лезги эдебият патал авур кIвалахрал акъвазна. Малум хьайивал, ам неинки лезгийрин сивин яратмишунар кIватIунин карда студентриз, алимриз еке куьмекар гайи, гьакI вичин ими, лезги прозадин диб эцигай Алибег Фатахован рехъ давамарай устад я.
Манидар Тамила Хидировади А.Фетягьан чIалариз туькIуьрнавай манияр лагьана, мярекат гурлу авуна.
Эхирдай юбилярдин уьмуьрдин юлдашди атанвай вирибуруз сагърай лагьана.
Мярекатдал кIватI хьанвайбуру къейд авурвал, Абдул Фетягьа вичин руьгь, рикI инсанриз тунва. Адан мурадар, хиялар шиирра ама…
Дагъви Шериф
