Мегьарамдхуьруьн районда, Советрин союздин Игити Абас Исрафилован тlварунихъ галай ДЮСШ-да, 26-28-октябрдиз 2002-2003-йисара дидедиз хьайи рушаринни гадайрин арада самбодай Дагъустандин кlвенкlвечивал патал турнир кьиле фена. И гьакъиндай «Лезги газетдиз» райадминистрациядин пресс-къуллугъди хабар гузва.

Мегьарамдхуьруьн райондин образованидин управленидини физкультурадинни спортдин отделдихъ галаз санал тешкилай спортдин мярекатда Мегьарамдхуьруьн, Новолакский, Сулейман-Стальский, Дербентский районрай, Белиж поселокдай, Махачкъала ва Буйнакск шегьеррай вири санлай 145 спортсменди иштиракна.

Кьве йикъан къене гьар са спортсменди вичин заланвиляй бягьсер кьиле тухвана. Турнирдин нетижада Мегьарамдхуьруьн райондин командади 1-чка, Сулейман-Стальский райондин командади 2-чка ва Новолакский райондин командади 3-чка кьуна.

Гъалибчийриз ва хъсан чкаяр кьурбуруз дипломар, медалар ва РД-дин образованидинни илимдин министерстводин патай кубокар гана.

«Лезги газет»