РД-дин Муфтиятдин Кьиблепатан территориальный округда марифатдин отделдин регьбер Шамиль Омаров, Кьурагь районда кардик квай «Инсан» мергьяматлувилин фондунин филиалдин регьбер Къази Гьабибулаевахъ галаз и йикъара Агьмадов Маликан патав фена. Идакай «Лезги газетдиз» «ЛезгиЯр» милли порталди хабар гузва.
Рикlел хкин, 2010-йисан июлдин вацра Малик Агьмадова Каспий гьуьле батмиш жезвай аял кьегьалвилелди къутармишдайла, вич яд элкъвезвай чкадиз аватнай. Ирид декьикьадилайни гзаф вахтунда жегьил гада цин кlаник хьана. Гъвечlи руш къутармишнатlани, Маликан сагъламвилиз зарар хьанай. Ам 21 юкъуз Каспийск шегьердин азарханадин комада хьана.
Мергьяматлувилин «Инсан» фондунин регьбер Къази Гьабибулаева Малик Агьмадоваз мягькем сагъламвал, диривал алхишна ва кьегьал гададиз материалдин куьмек гана.
«Лезги газет»
