Алатай вацра «Лезги газетди» Сулейман-Стальский райондин Агъа Стlалрин хуьре футболдин цlийи майдан туькlуьрзавайдакай хабар ганай. Райондин администрациядин пресс-къуллугъди хабар гузвайвал, Агъа Стlал хуьрелай гъейри, алай аямдин футболдин майдан Цlийи Макьарин хуьрени и мукьвара ачухда.

Цlийи Макьарал футболдин майдан «Развитие местных инициатив» государстводин программа уьмуьрдиз кечирмишунин сергьятра аваз, алай аямдин вири истемишунар вилив хвена, туькlуьрзава. И майдан патал республикадин бюджетдай 2 миллион манат пул чара авунва.

Спортдин цlийи майданрикай жегьилривайни, чlехи яшда авайбурувайни менфят къачуз жеда. Гележегда и майданар аялриз тренировкаяр ва мини-футболдай муниципальный акъажунар кьиле тухун патални ишлемишиз жеда.

«Лезги газет»