* * *
Жуваз течиз, кьунва за цIвел
Ранг янавай гимишдин.
ЦIийи уьмуьр — цIийи эвел —
Бегьер я гьи емишдин?!
Яраб кьулухъ галама вуч?
Заманадин гиширар…
Абур вири жеда, кас, пуч,
Къенин зегьер хъчирай.
Жезвач элкъвез — кIан туш акваз
Рехъ атIузвай тахайди.
ЦIийи йикъа, зи рикI жакьваз,
Хкудзава тахъвайди.
АкьалтIда мус ягъун, кьиникь,
Сад муькуьдан шехьун кьилихъ?!
2008
* * *
Хкахьзава муьгьуьббат зи,
Цуьк хьиз атIай, кьуразва.
Хура авай мусибат зи
Анжах жуваз аквазва.
Хкахьзава, гъед хьиз цава,
Какахьзава гьуьмерик.
Гьиссери, гваз маса гьава,
Югъ къалуриз вилериз,
Алцумзава рекьер фейи —
Муьгьуьббатдин мензилар.
АкI я, гьина ятIа хвейи
Ахгакьда зал къизилар…
Къизилдин ви кIелиз ктаб,
Уьмуьр, на заз гузва азаб.
1998
* * *
Гьатна рикIе вун, амач захъ кфун.
Аламат я им — гьинай я и гьисс?!
Йикъан гьалар зи мумкин туш такун —
Виринрай абур жезва заз хкис.
АскIан цаварни хъхьанва кьакьан,
Тарарини кваз дегишна нефес.
Квахьна мецин гьал, азар хьизтакIан,
Гафарик таза ахкатна гьевес.
Аквадалди вун, квачир жал зак чан?!
Ашкъидин гурлу акьунва за цIай.
МуьтIуьгъ тежер зун къе хьанваваз кван,
Руьгьди гузва лув, акъатна кьацIай.
Къвезмай йикъара гьикI хьуй зи тегьер,
“Ваъ” гафунив на гайитIа зегьер?!
* * *
Ахъа хьанва цуьк: чIехи хьанва пеш.
Абурув къени, яр, ви хъвер гума.
А хъвердин зунни къужахда ама.
Хъфизва гатфар — зун мад жезва геж.
Гатазва далдам, рахазва чIагъан…
Накь хьиз, варцел ви къалин я кьуьлер.
Вун аквазвай зи туьхуьзва вилер:
Къакъатайди чун, де лагь, гьикI ягъан?!
Амач хура рикI, гьиссзамач за жув.
Белки, хкахьна дуьньядал заз экв?
Марфадик квай зун, са тар хьиз,я тек.
Япа, макьам ваъ, гьатна такIан къув…
Ягъамир захъ вун, жуван хуьх гатфар,
ЦIийиз хквез, заз гузвай и гафар.
* * *
Акьван, акьван гуьруьшар,
Галачир са гьахъ,
Амач, ама хъуьруьшар,
РикIни хьанач вахъ.
Гатфарив гвай чил къацу
Кьур хьиз живеди,
Зун къайгъуда ава цIун,
Парцик деведин.
Гьатай чанда къайи зуз
Тежез акъудиз,
Ацукьда, ви гафар куз,
Элкъвей агъудиз.
Гвачир са кIус цIай-ялав,
Тагудай са экв,
Ацукьда, эхь, зун къулав,
Хиялар гваз тек.
* * *
Ингье вунни, ингье зунни —
Жагъура вахт квадарай!
Шумуд сефер рикI къазуниз,
Хьана сагъ — на гадарай!
Шумуд сефер хиял-хиял
Туьхвена, къвез, агатиз,
РикI — гагь гата, гагьни къаял
Алаз, хурай акъатиз!
Амач, амач, фена йисар,
ЦIелхемар хьиз, алатна.
Живедин чаз гъана яшар,
Уьмуьрдин пай галатна.
А йисарин ама эквер,
Хкьадай чи рикIери.
Экуьна ви ама чин, хъвер,
Багъишай заз рекьери.
А рекьерал къвана марфар,
Къвана пешер зуларин.
ХчIалзава за къе гафар
Ширин мецин чIаларин.
Вилик ква ви вири-вири,
Гьатна шумуд ктабда:
Хъуьрей вилер, нагъвни ири
Гваз, рикI аваз азабда.
1998
* * *
— Мусурманди кIандач “хъвана”,
Амайбуру, эхь, хъурай! —
Лугьузва са касди. — Къана
Чав гвайди, лагь, гьикI турай?!
Акваз-акваз луьркьна са-сад,
Гьатна михьиз къуватда:
— Мусурманвал кар я азад.
Хъвайиди, эхь, алатда!
Къатканва кас серин тарак…
Хашпересар аквазва…
Яргъи хьанва къвалав цIарак,
Тум ксайдак хкIазва.
Ахварик ква мадни са вад,
Сад чантайра къекъвезва.
“Кьил тIазва зи — кIандай са “кьатI”! —
Пехъ хьиз, тарал элкъвезва.
Ахварзава кIвалахдини,
Дергесрини кьуькери.
Югъ я пара дамахдинди, —
Гуьне чалдай къветери.
Зунни гьуьл
(Зарафат)
Гьуьлуьн зурба уьлкведа
Зун ава са луьткведа.
КIуь циз кIвачер авудна,
Адав за жув агудна.
КIан хьана нез лепедиз
Зун, са гъвечIи пепе хьиз.
Каф кIвачивди атIана,
Адаз за икI лагьана:
— Недайбур зун ава мад,
Вун я руфун чIехи сад.
Неъ, эгер тух тахьайтIа,
Хъине сад мад, жагъайтIа!
Килигмир гьакI, алатна
Хъвач, таярихъ ахгалтна!
Ван хьана зи, хъуьрена,
Гьуьл ракъиник куькIвена.
1979
«Лезги газетдин» 2018-йисан 43-нумрадай
