И йикъара чал Нариман Къарибован Дербентда ООО “Типография-М” издательствода чапна акъуднавай “Чахъ авай сад” тIвар алай шииррин кIватIал агакьна. Адан сифте шиирда ихьтин цIарар ава:

Наримана лугьузва ваз:
Вун къвердавай жеда абад!
Вун диде хьиз масан я заз,
Чи Лезги чил — чахъ авай сад!
Им шаирдин муьжуьд лагьай ктаб я. КIелзавайбуру адан виликдай акъатай “Зи ачух рикI”, “Пробуждение”, “Аманат”, “Югъ нисинлай алатайла”, “Дурнайрин мани”, “Хайи чилин чимивал” ва “75 гатфар” ктабар хушвилелди кьабулнай.
Къарибов Нариман 1939-йисуз Докъузпара райондин Къурушрин хуьре дидедиз хьана. Ада хуьруьн юкьван мектеб ва Азербайжандин университет куьтягьна. Пешекар журналистди чи республикадин шегьерринни районрин хейлин газетра, эхирдайни “Лезги газетдин” хсуси корреспондент яз кIвалахна. Алай вахтунда пенсиядиз экъечIнаватIани, печатдихъ галаз сих алакъаяр хуьзва.
Н.Къарибован эхиримжи ктаб акъатдалди са вацран вилик зи гъиле зи буба Абдурагьманан шиирар авай 1966-йисан “Дуствал” альманах гьатна. Ана Нариман Къарибова — а чIавуз, 30 йиса авай жегьилдин шиирарни ава. Адан фикирар, зигьин гьикьван дерин тиртIа, гьа чIавуз акъатай “Коммунист” шиирдай аквазва.

НикIи бегьер гъун тавуртIа,
зак тахсир кутур,
Тарци ичер гъун тавуртIа,
зак тахсир кутур,
Са дезгедихъ кIвалахдайла
агъзур фяледи,
Сад-садавди кьун тавуртIа,
зак тахсир кутур…

Зиди я тахсир, къарсурайтIа
гуьллейри чилер,
Зиди я тахсир, шехь авуртIа
дидейрин вилер,
Эгер хура гьатайтIа
чи бубайрин кьилер,
Мадни зун тахсирлуди,
зак тахсир кутур.

Чи инсанрин акьул гьуьл хьиз
дерин тахьайтIа,
Абуруз ватан чанарилайни
ширин тахьайтIа,
Хва дидедиз, диде хциз эркин
тахьайтIа,
Себеб чириз алахъмир куьн,
вири заз гьисс я.
Завай жузуз, куьз лагьайтIа,
зун Коммунист я!
Шииратдал рикI алай гьуьрметлубур, кIела Нариман Къарибован цIийи ктаб. Заз ам бегенмиш хьана.

Сардар Абил