17-июлдиз Дагъустандин Кьил Рамазан Абдулатипова РД-да авай къенепатан крарин Министерстводин коллегиядин гегьенш заседанидин кIвалахда иштиракна. Анал Дагъустан Республикада авай къенепатан крарин органри ва подразделенийри 2017-йисан сад лагьай паюна авур кIвалахдин гьахъ-гьисаб авуна ва йисан кьвед лагьай паюна вилик акъвазнавай месэлаяр веревирдна.
Кьилди къачуртIа, РД-да авай къенепатан крарин министр Абдурашид Мегьамедова малумарайвал, регионда авай гьалариз пис таъсир авунин кьилин себебрикай сад международный террориствилин тешкилатрин патай авай къурхулувал хьана. “МВД-ди кьабулай серенжемри, санлай къачурла, республикада гьалар гуьзчивилик кутаз, асул терефра министерстводин гьар йикъан къуллугъдин кIвалах хъсан еришра аваз хуьз алакьна. И вахтунда региондин территориядал алай бандподпольедиз хейлин зиянар гана. Им Дагъустанда авай хатасузвилин федеральный къуллугъдин управлениди, Росгвардияди ва къайдаяр хуьдай государстводин маса къурулушри чи къуллугъчийрихъ галаз санал авур кIвалахдин нетижа я. Къенепатан крарин подразделенийрилай тайин нетижаяр арадал гъиз алакьна. КIвалахда авай виниз тир агалкьунрай зур йисан вахтунда МВД-дин 32 къуллугъчи гьукуматдин ва ведомстводин виниз тир наградайриз лайихлу хьана”, — лагьана Абдурашид Мегьамедова.
Министрди гьакIни малумарна хьи, эхиримжи 20 йисуз сифте яз, цIи РД-да авай МВД-дин подразделенийрин личный составдин арада телефвилер хьанач. “Им шад жедай кар я, — лагьана ада, — амма МВД-дин вад къуллугъчидал жуьреба-жуьре заланвилин хирер хьана. Республикада хатасузвилин гьалар секинсузбур яз амукьзава. Гьавиляй чаз секин жедай ихтияр авач”.
Министр сифте гаф рахайдалай гуьгъуьниз заседанида авайбуру къуллугъдин везифаяр тамамардайла телеф хьайи къайдаяр хуьдайбур са декьикьада кисна акъвазуналди рикIел хкана.
Коллегиядин заседанидал рахай Рамазан Абдулатипова, санлай къачурла, республикада оперативный гьалар хейлин хъсан хьанвайди, им къуват гъиле авайбурун кIвалахдин нетижа тирди къейдна.
“Къайдаяр хуьдай органрин къуллугъчийрин викIегьвал себеб яз алай вахтунда республикада гьалар хъсанвилихъ дегиш хьанва.
2017-йисан сад лагьай паюна къайдаяр хуьдай органрилай общественный хатасузвал хуьз алакьна. Чи республика Россиядин Федерацияда дурумлу ва секин субъект я лугьуз жеда. Чаз аквазва хьи, къайдаяр хъсан ва общественный чкайра жезвай тахсиркарвилерин кьадарни тIимил жезва. Инсанар хъсан шартIара яшамиш жез вердиш жезва, гьикI лагьайтIа, абуруз са куьнини къурху гузвач.
2017-йисан майдиз республикадин территориядал Ватандин ЧIехи дяведа гъалибвилин 72 йис тамам хьун къейд авунин суварин ва Вирироссиядин зурба майданра “Рекьин тийидай полк” мярекат кьиле тухудай вахтунда хатасузвал таъминарунин серенжемар вини дережада аваз кьиле фена. Ингье республикада террориствилин гьерекатар авачиз кьуд йис жезва. Инсанрин рикIелай хъиткьинарунар, автоматрай гуьлле гунар яваш-яваш алатзава, абур кичIевал авачиз куьчедиз экъечIзава.
Амма эхиримжи вахтара чIуру ниятар авай бязи къуватар республикада миллетрин арада къал тваз чалишмиш жезва. Къайдаяр хуьдай органри яшайишдин рекьяй арадал къвезвай чуьруькриз миллетрин арада жезвайбуруз хьиз къимет гунин вилик пад кьун лазим я.
Заз куьне властдин муниципальный органрихъ галаз бес кьадар кIвалах тухун тийизвайвилиз фикир гана кIанзава. Идан гьакъиндай алатай коллегиядални лагьанай. Им властдин дибдин дережа я. Ам инсанриз лап мукьва я. Абурун, яни муниципальный органрин кIвалахдилай инсанри государстводин гьакъиндай ийизвай фикирар аслу жезва. И кардай МВД-дин векилрин иштираквал аваз МО-рин кьилерин Советдин заседание кьиле тухун чарасуз я”, — къейдна Рамазан Абдулатипова.
Дагъустандин Кьили гьакIни къейдна хьи, чи республикада терроризмдал гъалибвал къачун — им сифтени-сифте къайдаяр хуьдай органрин ва махсус къуллугърин игитвилин кIвалах я. И карда абуруз республикадин ва властдин муниципальный органри, гражданский обществодин институтри активнидаказ куьмек гузва. Гьа са вахтунда Р.Абдулатипова законсуз яракьлу дестейрин активный иштиракчияр кьунихъ ва терг авунихъ, абур финансралди, яракьралди таъминарунин, жергеяр цIийи ксаралди ахцIур хъувунин рекьер агалунихъ элкъуьрнавай, гьакIни абур гуьгьуьллудаказ рей гуниз мажбурзавай кIвалахар давамарун тапшурмишна.
Вичин нубатдай яз, Абдурашид Мегьамедова, Рамазан Абдулатиповаз санал кIвалахунай ва исполнительный властди къайдаяр хуьдай блокдин тереф хуьнай сагърай лагьана.
Республикадин Кьили Дагъустандин ва Россиядин Федерациядин абадвал патал гележегдани санал кIвалахунихъ инанмишвал къалурна.
“Зун куьне Дагъустан Россиядин Федерациядин виридалайни хатасуз ва агалкьунар авай регионрикай сад ийидайдахъ инанмиш я”, — лагьана Рамазан Абдулатипова.
Гуьгъуьнлай асул доклад РД-дин къенепатан крарин министрдин заместитель Сергей Карпова авуна.
“Дагъустанда санлай 7882 тахсиркарвал регистрация авунва. Залан ва лап залан тахсиркарвилерин кьадар 4,2 процентдин тIимил хьана, 6204 тахсиркарвал дуьздал акъудна. Къайдаяр хуьдай органрин къуллугъчийрин чандиз къаст авун, кьасухдай яна кьин, бандитвал, тарашунар авун хьтин закондин къайдаяр чIурунар тIимил хьанва”, — малумарна, кьилди къачуртIа, Сергей Карпова.
Мярекатда гьакIни СКФО-да авай Россиядин МВД-дин ГУ-дин начальник Сергей Бачурина ва республикадин къайдаяр хуьдай ведомствойрин маса руководителри иштиракна.
Гуьгъуьнлай кIвалахда тафаватлу хьайи МВД-дин къуллугъчийрив наградаяр вахкана.
