И йикъара Сулейман-Стальский райондин центрада кардик квай И.Г.Тагьирован тlварунихъ галай культурадин дараматдин гъвечlи залда лезги шииратдин классик, тlвар-ван авай шаир Етим Эминан эсерар устаддиз, фасагьатдиз кlелунин конкурс кьиле фена. Идакай «Лезги газетдиз» райадминистрациядин пресс-къуллугъди хабар гузва.

Кlелзавайбуруз ватанпересвилин тербия гунин, хайи чlалан гаф кlанарунин, хайи чlал машгьур авунин, алакьунар авай аялар винел акъудунин макьсадралди тухвай конкурсда райондин мектебрин 11-классра кlелзавайбуру иштиракна.

Аялрин алакьунриз, устадвилиз къимет гайибурун дестедик райондин ИМЦ-дин методист Назират Азимова, шаир Сажидин Саидгьасанов, культурадин отделдин начальникдин заместитель Ярагьмед Ярагьмедов, аялрин яратмишунрин кlвалин директор Муьрвет Милахимов, хайи чlалан муаллимрин ассоциациядин председатель Гуьзел Межидова квай.

Абуру аялри эсерар кlелунин фасагьатвилин, артиствилин ва маса кьетlен ерийриз къимет гана.

Конкурсдин нетижада гъалиб хьайибурузни хъсан чкаяр кьурбуруз образованидин управлениди грамотаяр гана.

Къейд ийин, Сулейман-Стальский районда Етим Эминан 180 йисан юбилейдиз талукьарна, хейлин мярекатар кьиле тухузва.

«Лезги газет»