И йикъара Мегьарамдхуьруьн райондин кьил Ф.Агьмедова «Самур» тlвар алай Мегьарамдхуьруьн ДЮСШ-дин ученик, алакьунар авай жаван спортсмен Мурадхан Зингьароваз нубатдин агалкьун тебрикна. И гьакъиндай «Лезги газетдиз» райадминистрациядин пресс-къуллугъди хабар гузва.

М.Зингьарова азаддиз кьуршахар кьунай Гуржистандин Батуми шегьерда кьиле фейи Вирихалкьарин турнирда гъалибвал къачуна.

— Мурадхан Зингьарова чун нубатдин сеферда шадарна. Вичин заланвилин дережада ада сад лагьай чка кьуна. Чаз жаван спортсмендин анжах агалкьунар, хъсан нетижаяр аквазва. Чна адаз рикlин сидкьидай нубатдин агалкьун мубаракзава. Къуй адахъ мадни зурба агалкьунар хьурай! – лагьана Фарид Агьмедова.

Къейд ийин, Мурадхан вирихалкьарин, Европадин дережайра кьиле фейи хейлин акъажунрин гъалибчи ва призер я.

«Лезги газет»