Алатай гьафтедин ял ядай йикъара Каспийскда, Али Алиеван тIварунихъ галай Спортдин дворецда, азаддаказ кьуршахар кьунай СССР-дин 9 сеферда, Европадин ва дуьньядин 5 сеферда чемпион, Советрин Союздин спортдин лайихлу мастер А.Алиеван международный 48-турнир кьиле фена. Алатнавай йисара и турнирдин сергьятра аваз дуьньядин 40-далай виниз уьлквейрай, 4 континентдай тир спортсменри гьасиррал чпин устадвал ва гьунарар къалурна. Чна виликамаз хабар гайивал, цIи турнирда дуьньядин 10 уьлкведай тир 150-далай виниз “азадбуру” иштиракна.
Турнир ачухуниз талукьарнавай шад мярекатдал Дагъустандин Гьукуматдин Председатель Абдусамад Гьамидов, адан Cад лагьай заместитель Анатолий Къарибов, Дагъустандин виликан президент Муху Алиев, Гуниб райондин кьил Агьмед Мегьамедов ва маса ксар рахана. Абуру, кьилди къачуртIа, А.Гьамидова къейд авурвал, Али Алиеван турнир спортдин и жуьредай гьамиша кесерлуди яз гьисабзава, и акъажунра чпин къуватар ахтармишиз дуьньядин цIудралди уьлквейрай гьар йисуз Дагъустандиз спортсменар къвезва.
— Чна, чи нубатдай яз, турнирдиз спортсменар мадни еке итиж аваз атун патал алахъунар ийида. Гуьгъуьнин йисуз лагьайтIа, чна алава инвесторар жагъуруналди гъалибчийрин премияр артухарун пландик кутунва. Чна фикирзавайвал, и карди са гьихьтин ятIани дережада турнирдин иштиракчийрин сергьятар артухаруналди ана чпин устадвал къалурзавайбурун кьадар, спортсменри адаз ийизвай итиж мадни хкаждай мумкинвал гуда, — алава хъувуна ада.
А.Къарибова турнирдин иштиракчияр тебрикунихъ галаз сад хьиз, Али Алиеван тIвар Дагъустандин спортдин яржуниз элкъвенвайди къейдна.
— Али Алиев дагъустанвийрикай сад лагьай кас тир чи спортсменриз международный майданра чпин гьунарар къалурдай рехъ ачухай. Ада дагъустанви спортсменрихъ устадвал авайди неинки са республикада ва СССР-да, гьакI адалай къецени тестикьарна. Азаддаказ кьуршахар кьун вилик тухунай адан лайихлувилер кваз кьунин лишан яз Швейцарияда, ФИЛА-дин штаб-квартирада, адаз памятник ачухнава. Ам дагъустанви спортсмендин гьуьрметдай республикадилай къеце хкажнавай сад лагьай мемориал я. Али Алиеван къаматдиз бахшна тухузвай, адетдиз элкъвенвай турнирди лагьайтIа, чIехи устадди вири дуьньяда азаддаказ кьуршахар кьунин спорт вилик тухунин кардик вичин пай кутун давамарзавайди субутзава. Турнирдихъ еке тарих ава, ам ФИЛА-дин календарда спортдин кесерлу акъажунрикай сад я, — къейдна Анатолий Къарибова.
Шад мярекатдилай кьулухъ и юкъуз бягьсер давам хъхьана. Дагъустанвияр тир Абакар Абасгьажиев (65 кг) ва Мегьамед Хизриев (74 кг), Азербайжандай тир Магьир Амирасланов (57 кг) ва Асланбег Алборов (97 кг) къизилдин медалриз лайихлу хьана. Гуьгъуьнин юкъуз турнирдин чемпионвилин тIварар дагъустанвияр тир Бекхан Гойгереевани (61 кг) Алихан Жабраилова (86 кг), украинви Ален Засеева (125 кг) ва италияви Франк Чамизоди (70 кг) къазанмишна.
Къейд авун лазим я хьи, турнирдин кьвед лагьай юкъуз 70 кг-дин заланвал авайбурун-Олимпиададин къугъунрин буьруьнждин призёр, дуьньядин чемпион, Европадин кьве сеферда чемпион Франк Чамизодин ва Европадинни дуьньядин чемпион Мегьамедрасул Гъазимегьамедован арада кьиле фейи бягьс виридалайни къизгъинди ва итижлуди хьана. Мадни лагьайтIа, италиявиди вич гьасирдал тухузвай саягъди акъажунриз тамашиз атанвайбур гьейранарна. Кубадай тир спортсменди фадлай Италиядин хкянавай командадик кваз вичин устадвал къалурзава. А.Алиеван турнир башламишдалди пуд гьафте амаз ам Дагъустандиз атана, меркезда Гь.Гьамидован тIварунихъ галай спортзалдай экъечIнач. Акъажунриз финалда “гуьруьшмиш жедалди» абуру гьар сада 3 бягьс тухванвай, ярумчух финал квачиз, ина Франк Чамизоди Аланиядай тир Заурбег Сидакьовахъ галаз къуватар алцумнай. И бягьс башламишай са тIимил вахтунилай З.Сидакьоваз тIарвал хьун себеб яз, ам духтурри гьасиррилай хутахна.
Гьа икI, вири санлай къизилдин 4 медаль къазанмишуналди, Дагъустандин хкянавай командади официальный тушир зачётда 1-чка кьуна. Турнирдин гъалибчийриз ва призёрриз Дагъустандин мастерри гъили гьазурнавай медалрилай гъейри, талукь тирвал, 150, 100 ва 50 агъзур манат пулни гана. Гъалиб хьайи спортсменрин гьар са тренерни 50 агъзур манат гуналди къейдна.
Рагнеда Рамалданова
