Играми Нариман Шамсудинович!

Дагъустандин чIехи районрикай сад тир XX асирдин Гомер СтIал Сулейманан тIварунихъ галай райондиз регьбервал гузвай куьн течир кас Дагъларин уьлкведа белки авач жеди. Куьн гзаф терефрихъай машгьур инсан я: алим хьиз, муаллим хьиз, насигьатчи хьиз… Чун паталди куьн хайи халкьдихъ рикI кузвай чIехи ватанперес, чIалан устад, камаллу насигьатчи, руьгьдин амадаг я.

Аллагьди квез захавилелди са шумуд рекьяй бажарагъ ганва. Гьи рекьяй фейитIани, куьне амайбуруз чешне къалурзава, гьар са камуна, гьар са легьзеда инсанвал хуьзва, бубайрин адетриз вафалу яз амукьзава, руьгьдин ивирар вине кьазва, лезгивилиз къуллугъзава.

Куьне регьбервал гузвай СтIал Сулейманан тIварунихъ галай район чи йикъара Лезгистандин медениятдин кьилин макандиз элкъвенва. Хайи чIал ва руьгьдин амай дестекар хуьнин макьсаддалди ина цIудралди мярекатар кьиле тухузва, квахьзавай адетрал чан хкизва, эдебиятдин, медениятдин, образованидин ва маса хилерин векилриз зегьметдиз кутугай къимет гузва. Чун гьеле куь сиясатдин рекьикай, районди экономикадин, яшайишдин, хуьруьн майишатдин хилера къазанмишзавай агалкьунрикай рахазвач. Гьа рекьерани куьн кIвенкIвечи жергейра ава.

Къе куь 50 йис тамам хьанва. Им инсандин уьмуьрди цуьк акъудзавай вахт я. Уьмуьр давам жезва. Къуй Аллагьди квез чандин сагъвални руьгьдин кIубанвал гурай! Куь рикIевай вири экуь мурадризни къастариз дуьнья акурай! ЧIехи мал-девлетрин сагьиб хьун уьмуьрдин шартI туш. Руьгьдин девлетлу хьун чIехи бахт я. Гьихьтин имтигьанра гьатайтIани, инсан яз амукьун чIехи агалкьун я. Куьн лагьайтIа, чи рикIера руьгьдал девлетлу инсан яз ава!

Играми Нариман Шамсудинович! «Лезги газетдин» редакциядин коллективди квез хайи югъ, юбилей рикIин сидкьидай мубаракзава! Сагърай куьн! Куь къадамар гьич садрани зайиф тахьурай! Куьн чи дамахни даях я!

«Лезги газетдин» редакциядин коллектив

Кьилин редактор: М.Ибрагьимов