Мегьарамдхуьруьн райондин Хуьрелрин хуьряй тир Балабегова Шекер Мурадовна алай вахтунда экономикадин илимрин кандидат, Оренбургский областдин Орск шегьердин Орский гуманитарно-технологический институтдин чlехи преподаватель я.
Шекер Балабеговадин диде-бубаяр районда сейли ксар тир. Адан буба Тагьир гзаф йисара мектебда жуьреба-жуьре къуллугърал хьана. Шекер Мурадовнадин диде Пери Мегьарамдхуьруьн райондин Киркарин хуьруьн медпунктунин заведующий тир. Аялриз, чlехибуруз медицинадин рекьяй,садрани кагьулвал тавуна, югъ-йиф талгьана къуллугъ авурвиляй ва вичихъ пешедин рекьяй еке алакьунар хьайивиляй адаз хуьре гьуьрметзавай.
Савадлу, камаллу ксари тербия гайи Шекер Балабеговади Муьгъверганрин юкьван мектеб куьтягьна. Сифтедай ам ДГПУ-дин къецепатан чlаларин факультетдик экечlна ва 1986-йисуз анаг яру дипломдалди акьалтIарна.
1989-йисуз ам хизандихъ галаз Орск шегьердиз куьч хьана. Адан уьмуьрдин юлдаш Агъабег Балабегован ери-бине Мегьарамдхуьряй я. Москвадин инженервилинни эцигунрин институт куьтягьайдалай кьулухъ Агъабег Балабегов Орск шегьердин металлоконструкцийрин заводдиз рекье туна. Ина ада цехдин начальник яз кlвалахна. 90-йисара Орск промышленностдин жигьетдай вилик фенвайбурукай сад тир. Ина кардик квай чlехи карханайрилай гъейри, Ватандин дяведин сифте кьилера и шегьердиз промышленный 28 кархана хкана. Советрин девирда и шегьер “Орск” холодильникралдини машгьур тир
— Шегьерда кардик хьайи зурба карханаяр, заводар, фабрикаяр исятда рикlел хкунриз элкъвенва, — гьайиф чlугунивди суьгьбетзава алим Шекер Мурадовнади. — Шегьердихъ вичин къудрат амач, карханайрин цlийи сагьибри, гележегдикай фикир тийиз, чпин гъиляй къведайвал ийизвай хийир хкудайдалай кьулухъ карханаяр гадарзава. Гьа ихьтин гьалара Южуралникелькомбинат кlевна, анаг муьрхъуь незва, Орскдин тракторрин прицепар гьазурдай завод ва якlарин комбинатни кардик кумач.
Орск шегьердиз куьч хьайидалай кьулухъ Шекер Балабеговади са шумуд йисуз аялрин бахчада ва мектебда муаллимвиле кlвалахна. 1993-йисуз мад са пеше къачун патал ам университетдин экономикадин факультетдик экечlна. Адаз бухгалтервиле кlвалахиз кlанзавай, амма кьисметди муаллимвилин пешедивай къакъуднач. Экономикадин факультет куьтягьайдалай кьулухъ алакьунар ва дерин чирвилер авай Шекер Мурадовнадиз деканди преподавателвилин кlвалах теклифна.
Гьа икl, къанни кьве йисуз Ш.Балабеговади Орск шегьердин жуьреба-жуьре вузра тарсар гана. Ада Москвада хуьруьн майишатдин экономикадин илимдинни ахтармишунрин институтда аспирантура куьтягьна ва экономикадин илимрин кандидатвилин дережа къачуна. Оренбургдин госинститутдин менеджментдин кафедрадин заведующий яз кlвалахна. Алимдин къелемдикай илимдин 45 макъала хкатнава, абур чи ва къецепатан уьлквейрин илимдин журналра чапдай акъатна. Адан илимдин кlвалахрикай бязибурухъ галаз Интернетдай таниш жедай мумкинвал ава. Макъалайрилай гъейри, адан къелемдикай 3 монография ва 2 учебник хкатна.
Илимдин кlвалахда къазанмишнавай агалкьунриз килигна адаз жуьреба-жуьре конференцийрал гьуьрметдин грамотаяр, дипломар ганва. 2015-йисуз алакьунар авай лезги алимдиз Орск шегьердин администрациядин кьили чухсагъул малумарна.
Шекер Мурадовнадин уьмуьрдин юлдаш Агъабег Балабегова алай вахтунда са фирмада директордин заместитель яз кlвалахзава. Абуру кьве хциз тербия гана. Чlехи хва Фаргьада экономикадин факультет куьтягьнава ва пешедин рекьяй кlвалахзава, гъвечlи хва Къурбан архитектурадинни эцигунрин факультетдин 3-курсунин студент я.
— Инсандихъ са Ватан жеда, амма чи уьмуьрдин чlехи пай Орскда акъатна, пешедин рекьяй мумкинвилерни ина жагъана. Ина чаз гъурбатэгьлийриз хьиз килигзавач. Урусатда яшамиш жезватlани, хайи Лезгистан гьамиша чи рикlера ава. “Лезги газетдин” къуллугъчийрихъ, кlелзавайбурухъ чандин сагъвал, рикlин шадвал хьурай! — лугьузва Шекер Балабеговади.
Къуй абурухъ мадни чlехи агалкьунар хьурай!
Куругъли Ферзалиев
