И келимаяр за къалажухви  Ферзалиев  Куругълидин  “Хайи чIаларин гьарайдиз” макъала кIелайла (“ЛГ”, №22. 31-май, 2018-йис) кхьизва. Авторди дуьз кьатIана: 6 кас депутатри туькIуьрна, РФ-дин Госдумадал гъанвай, чIала­риз талукь проект дуьз туширди гиламаз чир жезва. Адал разивал ийидайбурни  тIи­мил я.

Жуван милли лезги чIал заз вири я: ам чи эдебият, меденият, тарих, чун улу-бубайрихъ  галаз алакъада твазвай рахун тирдини гьиссна кIанда.

Мектебда чи аялри жуван чIал чирун — им Куьре Мелик, Етим Эмин, СтIал Су­лейман , Мегьамед Гьажиев, Хуьруьг Та­гьир, Шагь-Эмир Мурадов, Гьажибег Гьажибегов, Буба Гьажикъулиев, Мердали Жалилов ва масабур хьтин, лезгидалди рахунрин устадар рикIел ала лагьай чIал­ни я. Абур галачиз чи чIал гьикI гуьрчег ва ерилу, таъсирлу ва къадирлу жедай?

Ягъалмиш жез тахьурай, гьуьрметлу диде-бубаяр, лезги чIал чира куьнени, аялрини кIелрай мектебра. И месэла чалай виридалай аслу я.

Чечняда, Кабардада, Калмыкияда, Татарстандани вири депутатри и законопроектдиз чпин аксивални наразивал къалурнава. Зи хуьруьнвияр тир Сарижата, Гуьлуьзара, Садулагьа, Замиради, Тамилади, Мейлана, Исрафила, Гьажибега (диде-бубаяр я) ва масабуруни кIевелай чпин наразивал къалурзава. Амма гзаф миллетрин векилар санал яшамиш жезвай Дагъустандин Халкьдин Собранидин депутатар вучиз рази ятIа, гъавурда гьатзавач.

Райсудин Набиев