10-июлдиз Дагъустандин Кьил Рамазан Абдулатипова республикадин хуьруьн майишатдин ва суьрсетдин министерстводин коллективдихъ галаз цIийи министр Керимхан Абасов танишарна.
Рамазан Абдулатипова къейдна хьи, санлай къачурла, виликан министрдилай, хъсан еришар хвена, производстводин дережа агъуз авуд тийиз алакьна. “Мусафенди Абдулмежидович намуслу, зегьметдал рикI алай ва жавабдар кас я. Амма адан командадиз и хилен майданар ва гележег акунач, цIийи проектар теклифнач.
Чи илимдинни ахтармишунрин институт писди туш. Хуьруьн майишатдин академиядихъ еке мумкинвилер ава. Ибур вири ишлемишун, илимдихъ галаз алакъалу хьун лазим я.
КIвалахда авай куьлуь гъалатIриз килиг тавуна, кьиле тухвай намуслу, михьи кIвалахдай заз Мусафенди Велимурадоваз сагърай лугьуз кIанзава. Ада кьил кутур фикирар цIийи министрди кьилиз акъудун лазим я. Жуьреба-жуьре терефрай кар чидай экспертар желб авуна кIанда, федеральный ведомствойрихъ галазни сих алакъаяр хуьн лазим я. И карда цIийи министрдиз Гьукуматдин председателдин заместитель Билал Омарова куьмек гуда. Мусафенди Велимурадова лагьайтIа, Дагъустандин Кьилин советникдин ерида аваз вири и крарал гуьзчивалда”, — къейдна Р.Абдулатипова.
М.Велимурадова Дагъустандин Кьилиз ва санал бегьерлудаказ кIвалахай коллективдиз сагърай лагьана, К.Абасова чпи башламишай крар уьмуьрдиз кечирмишун давамардайди, хилен кIвалахдик вичин цIийивилер кутадайди къейдна.
Вичин нубатдай яз, Дагъустандин Кьили теклифнавай цIийи министрди вичи цIийи къуллугъдал вири жавабдарвал гьиссзавайди къейдна ва вилик эцигнавай вири месэлаяр тамамардайдак умуд кутуна.
Керимхан Абасоваз яб гуналди, республикадин руководителди метлебдин федеральный вири программайра иштиракун таъминарун ва и хел вилик тухун патал федеральный бюджетдай такьатрин кьадар артухарун тапшурмишна.
Идалайни гъейри, Рамазан Абдулатипова ведомстводин цIийи руководителдиз мукьвал тир вад йисан вахтунда агалнавай чилел майваяр гьасилунин рекьяй Дагъустан сифтегьан 5-чкадал, недай-хъвадай промышленностдин рекъемрай сифтегьан цIудан жергеда, дигидай чилер кардик кутунай сифтегьан пудан арада хьун патал зегьмет чIугуна кIандайди лагьана. Республикадин Кьили гьакIни хуьруьн майишатдин 500 кооператив тешкилун чарасуз тирди ва малдарвилел гьалтайла Россиядин юкьван рекъемрив агакьарун лазим тирди, чIехи базарар арадал гъун патал рикIивай машгъул хьана кIандайди къейдна.
