Дагъустандинни Белоруссиядин арада гьеле Советрин девирдилай инихъ дуствилин алакъаяр авайди тир. Къенин несилри абур гилани  давамарзава.

ИкI, сентябрдиз чи республикадиз, кьилди къачуртIа, Сулейман-Стальский райондиз Минск шегьердай яратмишунардай  тешкилатрин векилрикай ибарат тир десте мугьман хьана. Абурухъ Ярославль ше­гьер­дай хтанвай чи ватанэгьли, писатель Халилов Мамедни галай. Мугьманрин фикирдик чкадин яратмишдай интеллигенциядин векилар акун, абурун бязи кIвалахрихъ галаз мукьувай таниш хьун, тIвар-ван  авай музейриз тамашун квай. И месэлаяр фикирдаваз мугьманрин десте, сифте нубатда, чIехи камалэгьли СтIал Сулейманан му­зейдиз тухвана. Абурухъ чкадин писателар, публицистар галай. Му­зейда мугьманар директор Лидия  Стальскаяди, илимдин къуллугъчи Фейзудин Мамедова кьабулна.

Хваш-бешдилай гуьгъуьниз чIехи шаирди кутуна, къе чIехи хьанвай хатрутдин тарцик туькIуьр­на­вай гуьрчег беседкадик элкъвей стол тешкилна. Инал мугьманри, чеб СтIал Сулейманан ватандиз, адан музейдиз  атунин себебрикай, дагълух республикадин халкьарин медениятдиз итиж  ийизвайдакай лагьана. Чпиз инин дагълар, багълар, михьи гьава, хатурлу халкьар мадни бегенмиш хьанвайди къейд­на. Шаир, таржумачи, критик, публицист, Минск шегьердин писателрин Союздин отделенидин председатель, Белорусь Республикадин  писателрин Союздин правленидин член, “Белорусь — Россия” общест­водин председатель, Белоруссиядин милли литературадин премиядин лауреат Михаил Позд­няков, Бел­оруссияда яшамиш жезвай чи ватанэгьли, РД-дин лайихлу ху­дож­ник, скульптор, шаир Хизри Аса­дулаев, адан юл­даш Патимат райондиз атунал рази яз амукьна.

Абуру  чпин  тешкилатрин  кIва­лах­рикай, маса халкьарихъ, кьилди къачуртIа, да­гъустанвий­рихъ галаз дуствал мягькемарунин, са­да-садаз куьмекунин рекьяй ийиз­вай крарикайни кьиле тухузвай яратмишунардайбурун конкурсрикай, фестивалрикай лагьана.

Ахпа шаирар тир С.Саидгьасанова, М.Бабаханова, фотожурналист Т.Мегьамедова, Ф.Мамедова яратмишдай интеллигенциядин крарикай, акъудай ва гьазурзавай ктабрикай, чпин планрикай, чи гуьр­чег чкайрикай  ихтилатар авуна…

Гуьгъуьнлай мугьманар шаирдин па­мят­никдин патав фена, музейдавай эк­спонатриз тамашна. Музейдиз атайбурун ктабда М.Позднякова разивилин келимаяр кхьена, ахпа вирида санал шаирдин па­мят­ник­дин­ патав рикIел аламукьдай шикилар яна.

Мугьманар ва абурухъ галай чкадин векилар Алкьвадрал чIехи арифдар Гьасан-эфендидин музейдизни фена. Инин  директор Гьуьсейнов Гьуьсена атанвайбур му­зейдин тарихдихъ, ана авай гьар жуьре ядигар затIарихъ галаз тани­шарна.

Югъ рагъдандихъ элкъвейла вири Кьасумхуьрел хтана, И.Тагьи­рован тIварунихъ галай дворецдин гъвечIи залда кIватI хьана. Ина чкадин шаирри ва мугьманри чпин эсерар кIелна, сада-садаз ктабар багъишна. Эхирдай М.Бабаханова яр­гъал тир Белоруссиядай атай мугьманриз, абурухъ галаз хьайи чкадин яратмишдайбуруз райондин руководстводин патай сагърай лагьана.

Райсудин Набиев