12-октябрдиз Махачкъалада, “Дагпотребсоюз”-дин дараматдин вилик, машгьур шейх, дагъвийрин руьгьдин буба, чIехи алим Ярагъ Мегьамедаз бахшнавай мемориалдин кьул ачухуниз талукьарнавай мярекат кьиле фена. Ана РД-дин муфтий Агьмад Абдуллаева, Дагъустандин Халкьдин Собранидин, Махачкъала шегьердин Собранидин депутатри, республикадин Агъсакъалрин советдин, жемиятдинни илимдин векилри, динэгьлийри ва масабуру иштиракна.
Шейхди Дагъларин уьлкведин тарихда тунвай ирсиникай, адан кIвалахрин важиблувиликай Ярагъ Мегьамедан тIварунихъ галай мергьяматлувилин фондунин председатель Гьажибуба Рустамова гегьенш доклад авуна.
Мярекатдин сергьятра аваз Сулейман-Стальский ва Гуниб районрин администрацийрин векиларни рахана. Чпин рахунра абуру Дагъустандин халкьарин уьмуьрда Ярагъ Мегьамеда къугъвай роль, акьалтзавай несилриз ахлакьдин, руьгьдин тербия гунин жигьетдай шейхди тунвай ирсинин девлетлувал къейдна.
Ярагъ Мегьамед 1771-йисуз Куьре округдин Вини Ярагъ хуьре дидедиз хьана. Ам Кавказда муьруьдизмдин бине кутурди ва Дагъустандинни Чечнядин вири имамрин муаллим я. Адан тIвар вири дуьньядин тарихда гьатнава. Имам Шамила шейхдикай икI лагьана: “Садра кьванни шейх Мегьамедан вязерихъ яб акалай кас Исламдин асландиз элкъвезва ва душманрихъ галаз женгера ам магълуб жедач…”.
Агьмед Магьмудов
