Дагъустандин здравоохраненидин министерстводай “Лезги газетдиз” хабар гайивал, 12-октябрдиз РД-дин здравоохраненидин министрдин везифаяр вахтуналди тамамарзавай Жамалудин Гьажиибрагьимова Сулейман-Стальский районда коллегиядин совещание кьиле тухвана. Адан кIвалахда здравоохраненидин министрдин заместитель Мазай Рамазанова, министерстводин пешекарри, республикадин медицинадин идарайрин кьилин духтурри, гьакIни Сулейман-Стальский райондин кьил Нариман Абдулмуталибова иштиракна.
Мярекатдин сифте кьиляй Жамалудин Гьажиибрагьимова совещанидин иштиракчийриз авай месэлайрикай ачухдиз лугьуниз ва абур гьялдай рекьер къалуруниз эвер гана. “Медицинадин идарайрин регьберри вири къуватар серфна, авай мумкинвилер гегьеншарна, виликди фин лазим тирди аннамишна кIанда”, — къейдна министрди.
Сулейман-Стальский райондин центральный больницадин кьилин духтур Максим Ханбалаева районда медицинадин куьмек тешкилнавай тегьердикай суьгьбетна. Вичин доклад ада материально-технический гьалдилай башламишна. Кьилин духтурдин гафарай малум хьайивал, больницада капитальнидаказ ремонтар кьиле тухванва, гьакIни са кьадардин тадаракар цIийибуралди эвезнава-ЭКГ-дин аппарат, электрохирургиядин еке йигинвал авай генератор, рентгенкомплекс ва видеогастроскоп маса къачунва. Ада гьакIни больницадин стационарда 170 койка авайдини къейдна.
М.Ханбалаева мадни хабар гайивал, эхиримжи йисара федеральный ва республикадин жуьреба-жуьре программайрин бинедаллаз районда 6 ФАП эцигна ишлемишиз вахкуз, са ФАП-дани капитальнидаказ ремонт кьиле тухуз алакьнава. Вири санлай лагьайтIа, районда 11 ФАП ва 16 ФП ава.
Совещанидал къарагъарнавай месэлайрик онкологиядин азаррикди инсанар кьин артух хьанвайвилиз талукь месэлани квай. Ивидин гьерекатдин къурулушдин азаррикди инсанар кьинин дережани районда гьелелигда винизди яз амазма- ихьтин гьар са дуьшуьшдай махсус комиссияди кьил акъудзава. Районда “Тади куьмекдин” дестеярни бес жезвач.
Жамалудин Гьажиибрагьимова кIвалах артухарна кIанзавай хилер къейдна. Иник гележегда райондин медидарайрин гьам материально-технический, гьам сагъарунинни диагностикадин базаяр мягькемарун ква. Министрдин гафаралди, дарманралди таъминарунин месэладиз кьетIен фикир гун лазим я. Идалайни гъейри, Ж.Гьажиибрагьимова жегьил пешекарар, гьа гьисабдай яз “Земский духтур” федеральный программадин бинедаллаз, кIвалахал желбунин тапшуругъ гана. Ада медицинадин къуллугъчийрин пешекарвал хкажунихъни еке метлеб авайди къейдна.
“Здравоохраненидин месэлаяр тешкиллувилин жигьетдай вини дережада аваз гьялун лазим я. Эгер исятда чна здравоохраненидин хиле авай месэлаяр сад-садан гуьгъуьналлаз гьял тавуртIа, са затIни арадал къведач. Гьалар хъсанвилихъ элкъуьриз куьмекдай итижлу теклифар гьазура. Чи са гъвечIи гъалатIдини инсанриз таъсирзава, и кар чна гьамиша рикIел хвена кIанда”, — алава хъувуна Жамалудин Гьажиибрагьимова.
Чи мухбир
