Чи миллетдин лайихлу векилрикай малуматар раижунин кар чна давамарзава. Нубатдин куьруь ихтилат РФ-дин сергьятра жегьил алимрин жергеда авай Эльхан Гьажиханович Османовакай физва. Ам медицинадин илимрин доктор, Москвадин И.М.Сеченован тlварунихъ галай гьукуматдин сад лагьай университетдин факультетский хирургиядин 2-нумрадин кафедрадин профессор, Россиядин хирургрин обществодин член я.
Эльхан Османов Бакуда дидедиз хьана. Мектеб куьтягьайдалай кьулухъ ам Азербайжандин медицинадин госуниверситетдик экечlна ва 1998-йисуз анаг агалкьунралди куьтягьна. Гуьгъуьнлай хирургиядин рекьяй Бакуда интернатурада чирвилер артухарна.
1999-йисалай Эльхан Гьажиханович Россияда яшамиш жезва. Сифтедай кьве йисуз И.М. Сеченован тlварунихъ галай ММА-да хирургвилин пешедин рекьяй чирвилер мягькемарна. И вуздин хирургиядин кафедрадин профессор А.М.Шулуткодин регьбервилик кваз ада гзаф зегьмет чlугуна. Клиникадин ординатордин къуллугъдилай кlвалахдив эгечlай Эльхан Османовакай кафедрадин профессор хьана, исятда ада ина зегьмет чlугваз саки къад йис я.
Илимдин дережайрикай рахайтlа, 2002-йисуз ада медицинадин илимрин кандидатвилин ва 2009-йисуз докторвилин диссертацияр хвена. Исятда чи ватанэгьлиди преподавателвилин кlвалахдихъ галаз сад хьиз, клиникадинни илимдин рекьени зегьмет чlугвазва. Икl, адан къелемдикай 150 илимдин макъалаяр хкатнава, ада цlийи жуьредин пуд затl арадал гъанва. Э.Османова мукьвал-мукьвал симпозиумра, илимдин конференцийра иштиракзава.
Жегьил алимди къейдзавайвал, агалкьунрин кукlушар муьтlуьгъарун патал зегьметдал рикl хьана гьар юкъуз жуван пешекарвал вини дережадиз акъудиз алахъна кlанда.
— Чи халкьдин векилри илимдин, медениятдин, бизнесдин, гьукуматдин къурулушрин жуьреба-жуьре хилера лайихлу чкаяр кьунва. Абдусалам Гьуьсейнован, Сулейман Керимован, Салман Бабаеван, Эльхан Сулейманован ва масабурун тlварар кьун бес жезва, — лугьузва Э.Османова.
Чи ватанэгьли бажарагълу, зегьметдал рикl алай пешекар я. Идан гьакъиндай адакай Интернетдин сайтда бязибуру кхьизвай хуш келимайрини шагьидвалзава. Адан кьилив куьмек герек яз фейибуру къейдзавайвал, Эльхан Гьажиханович гзаф дикъетлу, лайихлу, савадлу, къизилдин гъилерин пешекар я.
Къуй адахъ мадни еке агалкьунар хьурай!
Куругъли Ферзалиев
